呢幾日好熱啊！一行出街好似就要溶咁，搞到無時無刻都好想食雪糕！咁啱，便利店呢排又有啲新貨返，有幾款新雪糕啊，又有藉口放肆了。

全球首推  Häagen-Dazs椰子熱情果雪糕

上天都唔能夠阻止哈根大師不停咁出新味！呢次輪到好係夏日感覺嘅椰子熱情果味呀。椰子嚟自印尼而熱情果嚟自南美，夾埋一齊又幾香。椰子味甜甜地，但冇想像中咁突出，反而淡淡地橙黃色嘅熱情果醬嘅酸味唔錯。

售賣地點：各大便利店及超級巿場

老字號  北川半兵衛商店抹茶雪糕

呢個綠茶品牌有好多年歷史喇，杯抹茶雪糕用嘅係宇治抹茶粉，食落唔會太甜，仲有些微嘅甘甘地嘅感覺，茶香味都有，加上製作時加入咗北海道牛乳，所以同時都食得出啲奶味，同埋口感好軟滑呀。抹茶控值得留個quota試一試嘅。

售賣地點：7-11便利店優先發售

鮮果雪條   樂天士多啤梨真鮮果雪條

生果係夏天另一樣解暑嘅恩物，呢條韓國品牌嘅雪條，就集冰品同鮮果於一身，仲要係女生大愛嘅士多啤梨味添！真材實料㗎，用韓國原粒士多啤梨製造，好似食緊冰士多啤梨咁，咬咬下仲時不時會咬到啲士多啤梨粒粒，好開心呀。

售賣地點：7-11便利店

文、相：Kar