報告報告，喺旺角發現幾個格格同皇帝，仲要喺度……食麻雀？搞乜鬼？唔同量子領域個研究成功，真係做到時空穿越？非也非也，係有間café搞搞新意，賣創意甜品之餘，仲有多款古裝畀客人著住嚟食，聽落又幾過癮喎！

呢兩副棋，睇得食得但唔打得。隻隻麻雀同象棋，都係倒模後，人手逐筆逐筆畫上去㗎。每副都係即叫即畫，心機嘢嚟，係要等耐少少㗎喇，畫起一副大約需時15分鐘啦。上色啲色呢，係人造色素混入啫喱粉製嘅，所以食落都有少少啫喱軟心嘅質感。麻雀嗰款係椰汁糕嚟，椰味幾香，QQ彈彈咁；象棋嗰款就係牛奶凍，有淡淡嘅奶味，但就偏軟身。

至於另一款創新甜品，芝士奶蓋芒果豆花嘅靈感則係來自坊間多款嘅奶蓋飲品，喺豆花面層再加上自家打發嘅奶蓋，微鹹帶酸，芝士味唔算好重。

用點心籠裝住嘅，唔係燒賣，而係扮燒賣嘅芒果班戟，又幾得意，幾配合舖頭古代嘅主題。不過店主透露，嚟緊6月起，會有真‧點心賣呀，到時選擇又可以再多啲。

除咗甜品之外，嚟食正餐都可以，有飽肚嘢食㗎，好似重慶酸辣粉咁，有多款配料同辣度選擇，開飯仔呢碗係中辣，佢嘅辣度係唔聲唔聲後勁嚇你一驚嗰隻。

 花雕醉雞翼

負責人表示自己本身好鍾意整甜品，15歲開始學整，學咗10年見時機成熟就自己開舖，加上本身貪玩，所以就諗咗呢個crossover嘅主題，搜羅多件古代服裝衫同頭飾返嚟畀客人著，暫時嘅服裝以唐、明、清朝為主，皇帝、格格、衙役等都有，仲好認真咁有埋唔同嘅道具，例如撥扇、詔書、大刀等，啱晒成班朋友嚟玩同打卡。一人揀一件著唔使怕醜，喺試業期間，每位著住服裝嘅客人仲可以有單點8折優惠添！

雲來客棧
地址：旺角彌敦道726號11樓全層

文、相、片：Kar