天后最近新開一間主打意日fusion嘅餐廳，由一對法國x香港夫妻開設，裝潢都好有驚喜，一行入店內好似去咗一個藝術館咁，石磚牆上掛滿一幅幅油畫，角落位亦有個小酒櫃，充滿異國風味。因為老闆想令客人有猶如置身外地嘅感覺，又見香港人鍾意日本菜，所以就炮製咗一系列混合日本風格嘅菜式～
冰火流心芝士西瓜扒（$142）
鹹嘅西瓜扒有無食過？西瓜扒有先醃過，加入抹茶海鹽，配上冰凍嘅burrata cheese，一冷一熱，唔少客人食過都話味道比想像中夾。
香脆天婦羅海鮮雪糕筒（$158）
海鮮雪糕筒包括炸蠔及炸魷魚圈，最吸睛係用自家製雪糕筒盛載，絕對啱晒相機食先！炸物用日本天婦羅粉去炸，口感更脆，點埋用乳酪、沙律醬、蟹籽及檸檬製成嘅蟹籽他他醬及辣味沙律醬食味道又添一份層次。最後雪糕筒都可以點醬食埋佢！
原鍋海膽蟹膏日本蟹籽燴意大利飯（$238）
鍾意食海膽，呢個原鍋海膽蟹膏日本蟹籽燴意大利飯係必試！飯底連埋蟹膏及海膽一齊煲，好重蟹味及鮮味，最後加埋蟹籽令口感及味道都更豐富。
秘製清酒海膽牛油醬燒波士頓龍蝦配日式鮮海膽及蟹籽（$265）
餐廳供應唔少龍蝦菜式，而呢道菜就將香港人鍾意嘅海膽及龍蝦一同料理，選用波士頓龍蝦，厚肉彈牙，龍蝦加上自家調嘅海膽醬一齊燒，鮮上加鮮。 而側面就係一個薯球配日本鮮海膽，內餡加入蛋白同奶油，一切開會流心！
更多【新店直擊】： |
日本斑蘭豆腐漢堡菠蘿包（$148）
素食者有得選擇，而且係坊間比較少見嘅創意素食菜式嚟～斑蘭菠蘿包係自己搵麵包廠製，包身口感鬆軟而上層就脆口，內餡係用豆腐、雞蛋及蘿蔔製成，加上牛油果及沙律醬，味道甜甜鹹鹹，一食就停唔到口。
香蕉榛果抹茶芝士可可醬法式厚吐司（$98）
餐廳於10am-6pm仲有供應多款鹹甜口味嘅法式厚吐司，斑蘭厚吐司同樣都係搵麵包廠製，夾心係抹茶芝士醬、榛子醬及奶油，加上抹茶朱古力醬及烤過嘅香蕉，味道香甜有層次！
士多啤梨抹茶芝士法式厚吐司（$98）
士多啤梨抹茶芝士口味就清新少少，內餡係藍莓醬，淋上用芝士及奶油製成嘅醬配上微酸嘅士多啤梨，食完都唔會覺得膩。
地址: 天后琉璃街4號地舖
文、相、片: Yanica