好多女生一見到甜品就會一秒變心心眼，如果你畀佢哋見到呢幾件韓式裱花蛋糕，佢哋一定會半秒就變心心眼，再加高八度嘅聲線：哇！好靚呀！唔信？睇完介紹你再去做個實驗吖。

呢幾款咁靚嘅韓式裱花蛋糕，係嚟自尖沙咀K11嘅一間新餅店嘅。店主係個好後生嘅女仔，喺上年先後去咗日本東京藍帶同韓國學整甜品同韓式裱花，返到香港之後自設教室同網店，直至最近就開埋實體店。

每款蛋糕面嘅花花都唔同，有大玫瑰、有小玫瑰，仲有太陽花等等。全部都好靚靚，開飯仔喺公司一拎出嗰陣，路過嘅女同事全部都忍唔住駐足欣賞同「借嚟影幾張」。無論幾個姊妹些牙食，定係男生送畀心儀嘅女生，都諗得過呀。

睇就好睇得喇，咁味道呢？用料係選用高級日本麵粉、法國牛油，同正宗嘅韓國白牛油製成，如果係牛油怪一定會好鍾意，因為夠香嘛。蛋糕口感係鬆軟嘅，而且唔係太甜，但就建議每啖都係蛋糕連埋花花咁食，因為面頭啲花花全部都係牛油嚟呀，淨食都幾膩呀。

舖頭另外仲會有法式小蛋糕、糖霜曲奇等賣，仲可以訂製大蛋糕添。

Bakery Plus
地址：尖沙咀河內道18號K11購物藝術館B1樓Market Place內

文、相、片：Kar