又到咗盛產生蠔嘅季節，最開心當然係一打打咁食啦，配埋杯香檳或者白酒就更加爽。不過最近太子有間酒吧就有新玩法，引入蘇格蘭嘅傳統食法——生蠔配威士忌！

生蠔係嚟自法國嘅，La Deesse blanche，又叫做海洋女神㗎。呢種生蠔嘅肉身幾爽滑，裙邊位仲特別鮮甜，蠔味比海水味濃。酒吧特別挑選咗隻蘇格蘭嘅威士忌同佢做partner，呢隻威士忌嘅泥煤煙燻味都幾重，最特別係仲帶有些少海風嘅鹹味，所以令到生蠔嘅層次更加豐富。

初初試嘅朋友仔，可以先試下用噴嘅方法。佢哋會免費提供威士忌噴裝，大家可以自行選擇噴嘅份量，少少地就可以令生蠔滲有微微嘅泥煤味。

不過當然，酒鬼覺得唔夠濃嘅，絕對可以叫返杯威士忌，成杯淋落去，再浸多佢一陣先食，咁就會同時食到蠔鮮味同鹹香，感覺都幾新鮮。呢期仲有優惠，叫任何威士忌或手工啤酒加$15就可以送一隻生蠔呀，每日5-8pm happy hour時段限定㗎留意返。

講開又講，佢哋最近on tap嘅有兩款蜂蜜酒，一款係蜂蜜啤酒，麥香同蜂蜜嘅平衡做得唔錯，另一款係蜂蜜酒，呢隻相對甜啲，好啱女生chill住飲啊。

而嚟緊11月中，仲會新出一套三款「花墟系列」嘅手工啤添呀，分別係茉莉啤、桂花啤、菊花啤，以冷泡嘅方式引出花香，再同啤酒花、麥芽連結，感覺幾fresh。聽聞首批限量版得100套，酒鬼想試嘅，而家預訂定啦。

The Oak Crafted
地址：太子通菜街223麗明大廈地下F號舖

文、相：Kar