就算唔係抹茶控，都應該聽過Via Tokyo呢個名嘅。抹茶軟雪糕最為出名，而且不時推出期間限定嘅時令日式甜品，令唔少甜魔都一樣心心眼。最近品牌去到位於灣仔碼頭嘅水產市場開期間限定店，將唔少招牌甜品搬過嚟，下次搭船過海前就可以買杯軟雪糕對住海景打卡啦！
 

白玉紅豆蕨餅抹茶雪糕筒（$56）

Via Tokyo x Yamataka日前喺築地‧山貴水產市場裡面開張，對抹茶控嚟講自然多個地方可以食到優質抹茶甜品啦。軟雪糕可以配搭多款配料，而白玉紅豆蕨餅係當中最受歡迎嘅配搭之一。
 

煙韌嘅白玉、香甜嘅紅豆同彈牙嘅抹茶蕨餅都唔會搶走抹茶雪糕嘅抹茶清香，仲襯托出抹茶嘅回甘。
 

糯米糍紅豆抹茶牛奶雪糕（$54）

唔係抹茶控都唔緊要，呢份糯米糍紅豆抹茶牛奶雪糕同樣材料豐富又易入口，扭紋雪糕係抹茶配3.6牛奶，增加一份牛奶甜香。
 

糯米糍唔單止增加顏色令賣相更吸引，軟糯而唔黏牙嘅口感亦非常討喜。
 

 

下午茶（抹茶卷+蕨餅+軟雪糕+日本煎茶）（$95）

雖然叫下午茶，不過喺呢間Pop-up店就係12:00至22:00全日供應！呢份有三份甜品加一壺熱茶（可揀日本煎茶或焙茶），最啱心大心細又咩都想試嘅你。
 

抹茶卷蛋糕鬆軟，忌廉有相當濃郁嘅抹茶香味。
 

蕨餅配黑蜜同黃豆粉，拉起嚟嘅時候特別有療癒感。而軟雪糕可以揀抹茶、牛奶或者抹茶牛奶扭紋。伴以白玉、紅豆同兩款脆米，細細份但口感層次一樣鮮明。
 

（左）Kiki 馬卡龍宇治抹茶雪糕、（右）Lala 馬卡龍北海道 3.6 牛奶雪糕（各$88）

最後提埋你，水產市場最近舉辦期間限定嘅Little Twin Stars秋之祭，當中馬卡龍雪糕杯就係選用Via Tokyo嘅軟雪糕，如果你係Little Twin Stars嘅Fans就一定唔可以錯過啦！
 

Via Tokyo x Yamataka
地址：灣仔灣仔碼頭2樓（築地‧山貴水產市場內）

文：Cathy
相、片：Tom Li