暑假就係要一家人食自助餐！當中當然又以海鮮最受歡迎啦係咪？尖沙咀呢間酒店最近就推出海鮮主題自助餐，由冰鎮海鮮食到海鮮菜式，即煮海鮮粥食到新鮮刺身。最後記得試埋酒店招牌甜品，一次過滿足哂各種願望！
 

必食冰鎮海鮮

冰鎮花雕醉鮑

雅苑座即日起推出鮑魚「蟹」逅海鮮三重奏自助晚餐，睇名就知首推當然係鮑魚！每人可憑券換領一份冰鎮花雕醉鮑，係將鮑魚用花雕、酒糟同冰糖浸至入味，酒香馥郁，鮑魚口感彈牙，加上餘韻嘅陣陣嘅花雕香，唔食就走寶啦。
 

（左）波士頓龍蝦，（右）加拿大長蟹腳

冰鎮海鮮區當中，就以大件而多膏嘅波士頓龍蝦最受歡迎，已經數唔到Refill咗幾多次，因為一出就會被掃走超過一半！而且無論係波士頓龍蝦定加拿大長蟹腳，都已經預先處理，食嘅時候自然更方便啦。
 

凍蝦、凍蜆、凍青口、翡翠螺

冰鎮海鮮選擇都算多，而且質素平均都唔錯，Keep到爽口彈牙。
 

海鮮熱食推介

（左）貴妃蜆，（右）瀨尿蝦

呢個熱食海鮮區就喺飲品區對面，有蟹、貴妃蜆、瀨尿蝦、東風螺等新鮮海鮮，揀好就可以交畀師傅用海鮮麵豉湯或者龍蝦蕃茄湯煮熟。怕太飽嘅話可以唔要麵，配搭自己口味嘅超足料海鮮湯！
 

（左）蟹肉鴨肝多士，（右）海鮮蟹皇粥

自助餐另一主角蟹亦有唔少菜式選擇，必試蟹肉鴨肝多士，蟹肉嘅鮮甜加上鴨肝嘅脂香同多士嘅脆口，無論係味道定口感層次都非常討喜。即煮海鮮蟹皇粥亦係人氣之選，可以配埋蟹肉海鮮粒鍋粑一齊享用呀。
 

（左）酥炸廣島蠔，（右）金銀蒜蒸粉絲扇貝

其他海鮮菜式當中就以呢兩款最受歡迎，酥炸廣島蠔外脆內Creamy，無論係大人定小朋友都會鍾意。而金銀蒜蒸粉絲扇貝就簡單但充滿鮮味，一樣係每次Refill一定會被大家掃走一半。
 

（左）燒美國特級肉眼，（右）燒芬蘭豬肉

食咗咁多海鮮，中間不妨食下肉。老實講燒牛肉算係自助餐當中「老是常出現」，反而燒豬肉就真係比較少見。餐廳特別選用芬蘭Omega3豬肉，燒至皮脆肉滑，食落比一般食到嘅仲更多汁。
 

 
酒店招牌甜品

（左）蝴蝶酥，（右）綠茶蝴蝶酥

嚟到呢度唔食返兩件蝴蝶酥就對唔住自己啦，皆因呢間酒店嘅蝴蝶酥相當出名，唔單止香港人，唔少台灣同日本遊客都識得嚟買返盒做手信！口感酥脆，富牛油香而唔油膩感，綠茶口味就更清新。雜果拿破崙都係另一必試！
 

即製班戟

另一推介係即製班戟，班戟皮有原味、朱古力同班蘭任揀，特別係班蘭都係其他酒店自助餐少見嘅口味。而餡料就可以揀忌廉、紅豆同香蕉，再邪惡啲額外再加兩球Häagen-Dazs雪糕，嚟個冰火口感刺激亦得，得咗。開飯仔今次就試咗班蘭班戟加香蕉餡，甜得嚟又有淡淡班蘭香。
 

餐廳位於酒店三樓室內花園，樓底達110尺高，仲有噴泉感覺特別舒適悠閒，最啱一家人嚟享受豐富晚餐。
 

鮑魚「蟹」逅海鮮三重奏自助晚餐
供應日期：即日起至2018年10月10日
供應時間：（星期日至四及公眾假期）18:30-22:00，（星期五、六及公眾假期前夕）18:30-21:45
價錢：（星期一至四）成人$608，小童$478；（星期五至日、公眾假期及前夕）成人$688，小童$518（另加一服務費）
*用OpenRice優惠券訂枱可享7折優惠（條款及細則）

雅苑座
尖沙咀麼地道69號帝苑酒店3樓

文、相、片：Cathy