香港人，係咩驅使你哋去食自助餐呀？係愛吖，定係責任呀？係oh seafood呀！一餐有咁多海鮮任食喎，點忍？講個消息你聽，尖沙咀有酒店嚟緊呢兩個月嘅buffet都係「澳洲‧龍蝦生蠔海鮮」主題，晚晚有成十幾款澳洲海鮮食呀！雖然價錢唔算話好平，但識揀識食，一定回本！

回本位1：冷盤區 – 加菲蟹、大泥蟹、日本毛蟹

平時啲蒲飛有蟹腳已經好開心，但呢度，有成隻蟹呀！仲要唔止一款，有成兩三款呀！加菲蟹同大泥蟹都好多肉，好鮮甜，而weekend嘅話，仲有日本毛蟹添！細細隻但好多膏，蟹迷記刷多幾隻啦~

回本位2：冷盤區 – 波士頓龍蝦

行到埋冷盤區已經聽到一隻隻波士頓龍蝦喺度呼喚緊大家，肉質彈牙厚實，好彩嘅仲有膏添。

回本位3：冷盤區 – 生蠔

主要供應兩款生蠔，大啲嗰隻係美國蠔，細啲嗰隻係澳洲蠔，兩款都係海水味較濃，肉質較實淨嘅。任拎唔嬲。

回本位4：冷盤區 - 貝類海鮮

同區仲有多款貝類海鮮，好似青口、鑽石蜆、翡翠螺等等，通通都係鮮味十足呀。

回本位5：Live station鐵板區 – 巨型澳洲虎蝦、黃金珍寶帶子

鐵板區有師傅助陣，7吋長嘅巨型澳洲虎蝦同直徑有成5厘米嘅美國黃金珍寶帶子，好大隻！都係即叫即燒，香噴噴，熱辣辣，食過一碟之後好難唔encore。

回本位6：Live station 鐵板區  - 法國鵝肝

另一邊嘅鐵板區就主力煎法國鵝肝，大大嚿一啲都唔孤寒。煎過嘅鵝肝，邊位好脆，配埋無花果醬，油脂香口。

回本位7：燉湯區  - 花膠川貝鱷魚肉湯

千其唔好漏咗啲靚湯呀。唔係忌廉湯嗰啲湯嚟呀，打開盅蓋一睇，係花膠川貝鱷魚肉湯呀，滋潤養顏，仲好足料，好清甜。

回本位8：肉排區 – 斧頭骨肉眼、羊架

除咗海鮮之外，自助區另一樣必食嘅就係肉排。呢度有烤焗斧頭骨肉眼、迷迭香焗羊架等等，啱晒肉食獸。

熱食：

至於熱盤，有鮑魚，亦有鱒魚及鱸魚等。

甜品：

雖然食晒咁多款海鮮同主食已經好飽，之但係甜品係第二個胃嚟㗎嘛！再戰鬥過！話明係澳洲主題，甜品當然都跟題啦。紅莓蛋白餅、澳洲國民餅乾Tim Tam製嘅Tim Tam朱古力蛋糕、檸檬夏威夷果仁蛋糕等等，都有得食。雪糕仲要係haagen dazs添呀，第二個胃都要留肚。

酒類：

有咁多海鮮，酒鬼實諗，有白酒就正。A，有呀，加$78可以無限量任飲生啤，加$98就可以無限量添飲sparking wine同紅白餐酒啦~~

詳情
「澳洲‧龍蝦生蠔海鮮大薈」自助晚餐
供應期：即日 至 9月底
時間：6:30pm – 10:00pm
價錢：
星期日至四（成人$628、小童$314）；
星期五、六、公眾假期及前夕（成人$678、小童$339）

咖啡廳
地址：尖沙咀彌敦道20號香港喜來登酒店2樓

文、相：Kar