香港有唔少海鮮餐廳，但打正旗號以青口料理為主題嘅就唔係好多，尖沙咀海傍位置最新就開咗間，選用藍青口入饌，好多都好大隻，飽滿味香，而且更創作咗4款以唔同國家風味為靈感嘅口味，帶嚟新鮮感。

4款招牌青口料理分別以比利時、法國、意大利同日本為藍本創作口味，餐廳更推薦沿用正宗品嚐青口嘅方法，先食一粒青口肉後，就用呢個殼當筷子咁，拎嚟夾起其餘嘅青口肉食嚟，既方便又有風味。而且每款青口料理都可配即炸薯條，點點醬汁食，層次又豐富咗（不過有啲汁較稀嘅，就未必啱點薯條了）。

 香草白酒汁煮青口(左)、藍芝士汁煮青口(右)

最傳統最經典嘅比利時地道菜式，香草白酒汁煮青口，以牛油、白酒、香草等食材引出青口嘅鮮味，係幾款口味中最清甜嘅。藍芝士汁煮青口則充滿法國風情，雖然藍芝士有陣獨有嘅濃香味道，本身未必人人都接受到，但化身成汁醬後，味道變得較為溫和，微微鹹香帶有蘑菇香，配青口又幾夾。

 羅勒番茄汁煮青口(左)、柚子胡椒忌廉汁煮青口(右)

意大利代表羅勒番茄汁煮青口，番茄湯底酸酸甜甜，配搭清新嘅香草羅勒，食落係refresh嘅；至於最特別亦最推介大家一試嘅係日本代表，柚子胡椒忌廉汁煮青口，比較少喺坊間見到青口配呢隻味呢，酸中帶微辛，幾有驚喜。

除咗青口料理外，特色主題奄列亦係呢度嘅重點之一。以日本雞蛋製作嘅奄列，混入煙三文魚、海膽芝士或巴馬火腿等各種食材，碰撞之間撞出新火花。厚得嚟但軟滑嘅奄列，蛋香味濃，配搭意大利生火腿則滲出淡淡鹹香，味帶甘甜。

肉食獸唔使擔心，有肉食嘅。美國Prime側腹牛排配菠菜以炭火烤煮，牛側腹脂肪紋路細緻，帶有油香，肉質有嚼感。

THE MUSSELS
地址: 尖沙咀梳士巴利道18號Victoria Dockside K11 Musea地下034 及 032B號舖

文、相、片：Kar