可能你好耐都冇上過山頂？但最近山頂廣場開咗唔少新餐廳呀，仲有間甜品餐廳，有得任食放題甜品兩個鐘啊！可以上去行個快山，做咗少少運動再食嘢咪冇咁罪惡感囉（好似係）。

呢個甜品放題，有10幾款甜品選擇。由於餐廳希望可以將甜品保持喺最新鮮同整潔嘅狀態，各款甜品會放喺架甜品餐車上，由侍應好似推點心車仔咁推勻全場，睇啱邊款出聲揀就得喇。

夏天想要多少少酸咪咪嘅，有香草紅桑子杯、法式香橙乳酪蛋糕。

仲有造型精緻嘅柑子撻。

比較特別嘅就有煎茶芝士杯，淡淡芝士香中滲有茶嘅甘甜風味。

相對上light少少嘅香草豆泡芙同玫瑰草莓cupcake，都好係女生嘅心頭好。

大大份蛋糕可以即場切嘅，分別有綠茶紫蘇蛋糕、朱古力蛋糕、香草栗子蛋糕同伯爵歌劇院蛋糕等。

除咗甜品放題之外，同時仲可以單點5款精選甜品。呢5款甜品都係由造型到味道配搭，都係由有近廿年甜品經驗嘅師傅親自研製，好有個人風格，有別於一般嘅甜品。就以拿破崙革命為例，傳統嘅拿破崙都係一層千層酥一層cream咁，但師傅就將佢哋拆件上碟，可以逐part逐part食，試真啲每part嘅味道，然後再撈埋一齊食又得。變化多端，配埋微酸嘅芒果熱情果雪葩亦有甜解膩。

另一款突破框框嘅甜品係摩登芝士餅配紅莓柚子雪葩，點睇都唔似件cheesecake，一個個白色波波，原來已經係cheesecake嘅本體，呢款仲係素甜品嚟添，冇落過雞蛋㗎，而餅底係gluten free嘅甘寶脆脆，連埋一齊食會有濃濃嘅芝士味喺口中爆發。師傅亦刻意插多幾塊香橙薄脆喺面，令到成份甜品食落感覺會清新啲。

至於無窮朱古力配黑西梅雪葩，則係以法國品牌嘅朱古力製作，將朱古力製成唔同嘅形態。朱古力啫喱用嘅係40%朱古力，cream呢就係70%，所以雖則成碟都係朱古力，但食落嘅甜度同層次仲有口感都各有分別。黑西梅雪葩帶酸，一啖朱古力一啖雪葩咁食，就唔怕會太甜啦。

紫色夏天（即係黑加崙子mousse加紅莓醬加紫蘇葉啫喱等）配紅莓柚子雪芭同埋檸檬撻 配椰子雪糕，同樣都係酸酸甜甜，大熱天時食就最開胃！

Mina House
地址：山頂山頂道118號山頂廣場G樓G03號舖及1樓101號舖

文、相、片：Kar