東京個築地市場到底幾時搬暫時都係未知之數，但最近香港就先興起海鮮丼熱潮。由海鮮丼專門店到迷你築地市場搬嚟香港，都喚起咗唔少日本菜Fans對海鮮丼嘅慾望：一碗色彩繽紛，鋪滿新鮮刺身嘅海鮮丼，「味」力之大足以令所有人忘記減肥大計，一齊投入到呢個海の幸嘅鮮味海洋當中。

築地直送鮪魚加持　　豊洲水産海鮮丼専門店

帶住「築地市場水產店首間海鮮丼専門店」嘅名號，灣仔呢間新開嘅餐廳唔少人都相當期待。幸而出品的確符合大家期望，海鮮幾乎每日從築地直送到港。足二人分嘅豊洲海鮮丼有齊牡丹蝦、海膽、皇帝蟹肉等刺身，當中亮點係嚟自著名漁港三崎港嘅鮪魚，鮮甜味美。想再試真啲鮪魚滋味，記得點黑鮪霜降腹身丼。

自己丼飯自己揀　　豊勝手丼

圖：missHKfoodie，lokyanyan

勝手丼其實即係日本海鮮市場常見，先買一碗醋飯再自己加配唔同刺身嘅形式。銅鑼灣呢間新開嘅海鮮丼小店就同時有定食、勝手丼同師傅發板(omakase)三款選擇。勝手丼最少要揀三款刺身，價錢有平有貴，自己配搭屬於自己版本嘅海鮮丼。完全唔想諗就可以點師傅發板，由師傅幫你揀最新鮮嘅日本直飛刺身，一樣滿足。

宵夜嘆大堆頭爆丼　　爆丼屋

圖：Chocopric

又一間新開丼飯店，旺角呢間就由曾經擔任半島大廚而且有超過30年日本菜經驗嘅師傅坐鎮。除咗疊到高一高嘅爆盛慢燒牛肉丼，海鮮丼水準亦唔錯。四重火山盛丼有齊港人最愛嘅海膽、吞拿魚腩蓉、松葉蟹肉同三文魚籽。帆立貝·三文魚籽盛丼鮮味十足，而火焰盛丼經過炙燒後魚油香味突出，各有千秋。開到凌晨兩點，宵夜嚟嘆海鮮丼都得。

浮誇雙層海鮮丼　　丼家

圖：gemini_moffatts，糖小妹

元朗呢間小店嘅究極丼分兩層，上層係片切刺身，下層係角切刺身、醋飯同中間一細杯嘅蕎麥麵。兩層嘅刺身有三文魚、吞拿魚、劍魚腩、帶子、甜蝦等總共12款，無論係賣相定Package都相當浮誇！唔少食客都話佢地嘅三文魚特別出色，所以三文魚海膽親子丼亦非常受歡迎。

平靚正醬油海鮮丼　　哲平食堂

圖：wander2wonder，JJcaptain

灣仔呢間立食食堂其實係嚟自新加坡嘅過江龍，主打醬油丼飯。招牌九州醬油海鮮丼有唔少厚身角切醬油魚生，最突出嘅係三文魚同三文魚籽，新鮮甘香，吞拿魚同油甘魚等口感亦對板。醬油調味得宜，有鹹香而唔會蓋過刺身味道，啱哂送飯。最緊要係暫時全部丼飯都係$100有找，Lunch想食豪少少慰勞自己都唔會肉赤。

霸氣龍蝦二段丼　　弘 CHIRASHI

圖：有大食大

喺香港嘢食一上枱要相機先食是常識吧，想喺眾多美食相當中突圍而出，灣仔呢間日本料理店嘅蝦蝦霸霸二段丼一定幫到你，子母碗特別高高在上，而且上面仲有隻特別霸氣嘅波士頓龍蝦！龍蝦爪肉彈牙，而龍蝦尾就係撈咗龍蝦膏嘅醋飯。下面係吞拿魚腩蓉同雜錦刺身飯，再加隻溫泉蛋，多重享受。

山仔咁高三食海鮮丼　　宗像屋

圖：Guapo

深水埗低調小店，只賣一款海鮮丼，不過就有四個價錢，刺身數量同分量各有不同，豐儉由人。最基本嘅「梅」已經有九款海鮮，堆到成座小山咁相當吸睛。丼飯加芥末同豉油撈勻食得，用紫菜包嚟當手卷食亦得，最後連埋前菜嘅油甘魚麻醬刺身請師傅做成茶泡飯更得！一丼三食各有滋味。

抵食經典自選三色丼　　定食 Doraya

圖：au9

呢間尖沙咀銅鑼灣都有分店嘅定食屋，或者一早已經係唔少海鮮丼Fans嘅推介之一。雖然無誇張賣相，但勝在出品Keep到水準夠平實。自選三色刺身丼可以喺十幾種刺身選擇裡面任揀三款，係最受歡迎嘅定食。另外佢地嘅吞拿魚亦相當出名，藍鰭吞拿魚扒丼入口軟嫩鮮甜。定食套餐包埋茶碗蒸、漬物同味噌湯，全部都唔係行貨，再加分。