熊本唔單止係Kumamon嘅故鄉，仲係好多靚食材嘅產地！尖沙咀新餐廳割烹櫓杏，就係以熊本為主題，九成食材都係來自熊本，當地有黑毛和牛、肥後六華豚、各式海產、燒酌等，連水都係熊本直送，咁要飲返夠本喇！

主理嘅兩位日籍廚師本田榥二同石山真夏，將充滿熊本風味嘅鍋物、刺身壽司帶來香港，另外亦有融合法國及東南亞做法嘅fusion菜式，成個餐牌好厚，選擇夠晒豐富。

客人面前即炒焙茶

涮涮鍋設焙茶及鰹昆布兩款專用湯底，都會喺客人面前即席炮製！好似焙茶湯底，侍應將熊本名茶「矢部茶」放入特製器具，在客人面前即時用火烘焙，好快就聞到陣陣茶香，再將茶葉倒入來自熊本嘅清水之中，水滾後隔起茶葉，焙茶湯式就完成啦！

另一款鰹昆布湯底，選用熊本老店「山一」嘅高級本枯節鰹魚，鰹魚即刨即煮，湯底富木魚鮮味。兩款清淡湯底配A4級熊本和牛就最匹配喇。

焙茶湯底 $68、A4熊本黑毛和牛極上西冷 $258、肉眼扒 $258、西冷 $198

濃郁自家製湯底

和鍋則以三款自家製湯底做主角，可以揀天空黑鮪魚辣味噌湯、肥後六華豚豬骨湯、鹿兒島赤雞薩摩雞湯，用足6小時熬成，味道相當濃郁！ 和鍋配肥後六華豚最夾，推介薄切豬脊肉片，肉質嫩滑帶甜味。仲有六款調味料同配料，亦可以另加超濃縮骨膠原精華，令湯底更加濃香。

肥後六華豚豬骨湯、天空黑鮪魚辣味噌湯、鹿兒島赤雞薩摩雞湯 各$68

豬脊肉片 $78、豬側扒 $98、豬肋肉 $98

首創日式肉骨茶

至於最特別嘅菜式，一定係呢款日式肉骨茶！用肥後六華豚骨排加蔬菜、香料等熬6個鐘，赤肉骨茶辣辣哋，有番茄同味噌味道；而黑肉骨茶則以黑蒜及醬油煮成，入口微鹹富蒜香。每鍋都好足料，起碼要兩三個人分！

赤肉骨茶、黑肉骨茶 各$158

餐廳門口有熊本空運來港嘅食材，包括蔬果、日本酒同調味料，連傳統手工藝都買得到！

割烹櫓杏

地址：尖沙咀彌敦道63號iSQUARE國際廣場28樓2801號舖

電話：2818 0031

文、相：Perrins