呢間藏身於觀塘工廈嘅人氣台式餐廳最近裝修後、以新形象重開，Menu選擇更豐富，例如多咗即煎嘅台式鐵板吐司，西式嘅意粉、巴斯克芝士蛋糕等。當然大家鍾意嘅牛肉麵、蛋餅、芋圓依然繼續供應，配埋杯芋頭或者奶蓋飲品，可以幻想自己去咗台灣開餐呀。
伊甸前身係原址嘅小伊甸，負責人指開業五年後希望可以換個形象同環境，因此裝修同格局都煥然一新，變得更加清新簡約。不變嘅係依然同賞茶合作，由佢哋提供多元化嘅台式飲品。
多款台式、西式主食
Deluxe All Day Breakfast（$128）
全日早餐「升呢」回歸，有齊煙三文魚沙律、煙肉、日式豚肉腸、滑蛋、茄汁焗豆、蕃茄、薯餅同牛油丹麥吐司。分量十足同時又唔會太膩，皆因材料都調味得宜，例如煙三文魚沙律加入胡麻醬，醬汁帶甜可以平衡煙三文魚嘅鹹味。
即煎台式鐵板吐司+蛋餅
台式鐵板吐司：龍蝦沙律滑嫩雞蛋（$88）
開飯仔私心大推嘅就係台式鐵板吐司，特別選用本地製作嘅丹麥吐司，比一般吐司更酥脆，而且帶牛油香。重點係收到Order後會加牛油煎香丹麥吐司，食落牛油香更突出！餡料有四款選擇，想輕盈啲可以揀呢款龍蝦沙律滑嫩雞蛋，龍蝦肉彈牙，配埋加咗明太子嘅沙律醬同柔滑炒蛋，味道啱啱好。
寶島蛋餅配輕量沙律（一款配料$67，兩款配料$77）
蛋餅可以自選配料，負責人指唔少人都會揀芝士配肉鬆或者粟米，開飯仔就試咗芝士同肉鬆，兩款材料都帶鹹香，而且半融芝士同蓬鬆酥脆嘅肉鬆真係好夾。蛋餅亦特別從台灣引入一款比較酥脆嘅蛋餅皮，煎完特別香口。而沙律唔單止解膩，重可以畀細食嘅朋友仔當Lunch都夠飽。
牛小排台式牛肉麵
台灣金牌高根牛肉麵配涼拌小食（$82）
之前熱賣嘅台式飯麵亦繼續供應，牛肉麵選用以高筋麵粉製作嘅麵條，麵質彈滑，就算浸咗湯一陣都唔會太腍。牛肉就揀用牛小排，取自肋脊部位、油脂較多，炆至入味後非常軟嫩多汁！湯底就以牛香同蔬菜甜味為主，帶少少辣味相當醒胃。
打卡必點！黑糖奶蓋巴斯克
黑糖奶蓋波霸芝士蛋糕（3.5吋，單點$50，跟餐+$40）
最新打卡甜品！自家巴斯克芝士蛋糕加入台灣青檸製作，幽幽清香同酸味可以平衡芝士蛋糕嘅膩感。建議不妨先試原味，再按喜好淋上黑糖奶蓋同波霸珍珠。
兩款配料都以台灣黑糖獨特嘅焦香為主，同芝士蛋糕估唔到又即夾。奶蓋非常Creamy豐厚，波霸Q彈有嚼勁。
紅豆仙草芋圓（單點$40，跟餐+$30）
台式甜品又點少得芋圓呢，芋圓加上仙草凍同紅豆，再淋上淡奶係經典不敗組合。三色圓口感煙韌，食得出淡淡地瓜或者芋頭香。紅豆煮至軟綿起沙，仙草凍亦非常軟滑，不過就略嫌甜味蓋過仙草香氣。
高質賞茶台式飲品
手工芋頭奶綠（單點$40，跟餐+$15）
賞茶嘅飲品選擇有純茶、奶茶、奶蓋茶、果茶等，黑糖奶蓋更係坊間少見嘅配料。最抵嘅係所有台式飲品跟餐都係$15咋！開飯仔就試咗手工芋頭奶綠，飲到一粒粒台灣大甲芋頭肉，加上茉莉綠茶嘅花香同回甘，甜而不膩。
伊甸
地址：觀塘官塘道436-446號官塘工業中心第四期1樓C室
文、相：Cathy.H