近年有唔少Cafe裝修都以特別顏色為主，太子呢間新店更用咗Pantone色卡概念，由打卡牆、擺設，甚至連紙巾都好似色卡咁！甜點都好有心思，大部分都係自家製，好似焦糖布甸吐司、濃厚芋泥山等。飲品就以自家乳酪為主，配搭唔同新鮮水果，酸甜消暑！
 

MOONTONE係長洲角酪嘅姐妹店，走日系現代Cafe風格。餐廳以「What is your color today?」為概念，而Pantone色卡就係其中一個表達方式，等大家可以好似揀Pantone顏色咁，去揀自己鍾意嘅嘢食同飲品。除咗有長洲角酪嘅招牌乳酪飲品之外，新店仲多咗鹹食選擇呀。留意返逢星期一係寵物友善日，歡迎各位毛孩主人Book枱嚟打卡！
 

軟殼蟹滑蛋吐司（$88）

吐司用丹麥吐司取代一般麵包，加埋蜂蜜食落香口啲之餘，同餐廳自家調配嘅沙律醬、牛油都係最夾。主角當然係大大隻嘅軟殼蟹，口感酥脆，配埋蟹籽滑蛋、芝士等，口感豐富好滿足！而一邊嘅沙律仲特別加上胡麻醬同木魚絲，令味道同口感層次更豐富，同時仲增加和風感。
 

卡邦尼煙肉薯糰（$88）

薯糰（Gnocchi）咬落會有薯仔嘅香味，口感偏軟同粉，有新鮮感。而醬汁有煙肉同煙肉乾，所以食落充滿鹹香，同時亦有芝士香。篤穿埋生蛋黃一齊食，更香之餘亦令口感更滑溜。
 

濃厚芋泥山（$88）

店主親自每朝去街市揀新鮮芋頭，人手製作淺紫色、微甜版本嘅芋泥，口感軟綿、偶然有細細粒嘅芋頭，食得出真材實料！裡面嘅蛋糕都係自家製，口感有啲似台式嘅古早味蛋糕，鬆軟綿密、蛋香濃郁，同芋泥天然甜味都幾夾。
 

角酪卷蛋（$45）

將長洲角酪嘅招牌甜品帶過嚟新店，鬆軟嘅蛋糕用蝶豆花天然色素上色。裡面就係乳酪忌廉同士多啤梨忌廉，分別用自家乳酪同士多啤梨乾打成嘅粉製作，Creamy同時味道自然，整體酸甜清爽。
 

焦糖布甸吐司（$68）

自家布甸用新鮮雞蛋、忌廉等製作，口感軟Q綿密，蛋香突出唔過甜，係店主們研發時覺得同吐司最夾嘅平衡。配搭丹麥吐司係為咗增加層次，令呢個甜品唔會從頭到尾只有滑溜以個口感。布甸面嘅焦糖會偏大人苦甜口味多啲，加埋吐司嘅蜂蜜就會有唔同嘅層次。
 

 

莓莓角酪（$42）

新店飲品同長洲角酪一樣選用自家製乳酪，加店主每日去西環果欄同油麻地果欄揀嘅新鮮水果打成，天然無添加！呢杯打卡一流嘅莓莓角酪以士多啤梨香同乳酪香為主，酸酸甜甜，仲有粒粒紫米增加咬口。
 

小英角酪（$45）

選用台灣金鑽鳳梨，味道清甜、果肉爽脆有咬口，同乳酪一齊飲酸甜平衡。店主表示希望之後可以推出更多時令鮮果相關嘅新品。
 

Dirty（$36）

咖啡選用偏堅果風味嘅巴西單品豆，而呢杯Dirty嘅分層明顯，記得唔好搞勻，入口就可以同時品嘗到熱嘅濃縮咖啡同冰凍嘅牛奶，牛奶嘅甜味可以突出咖啡嘅香醇。
 

MOONTONE
地址：太子砵蘭街440號地舖

文、相：Cathy