等到頸都長，呢間日本人氣茶室終於會喺星期六(28/9)進駐尖沙咀新商場！裝修以自然田園風為主，供應從世界各地嚴選嘅優質茶飲，豐富嘅招牌Afternoon Tea Set，按時令更換款式嘅輕食同甜品等，尖沙咀店亦暫時係佢哋唯一一間海外分店！
 

Afternoon Tea TEAROOM喺日本有90間分店，更係2018年日經TRENDY雜誌「餐廳連鎖店滿意度排行」中，茶室及甜品類別嘅第1位！香港店嘅員工經過三星期訓練，而且餐廳採用當中約500款食材由日本代表評測過，確保大家喺香港食到、感受到嘅同日本店一樣。
 

Afternoon Tea Set（$168）

以貫徹品牌田園風嘅藤籃奉上一人分量嘅下午茶，即係八款甜品當中任揀三款同自選紅茶。八款甜品點揀好？第一次食嘅話必點日本最受歡迎嘅招牌Strawberry Shortcake！
 

上面係士多啤梨果肉，配搭北海道牛奶忌廉、鬆軟海綿蛋糕同果香濃郁嘅士多啤梨果醬。最出色嘅係忌廉唔會過甜，而係以牛奶香味為主，口感輕盈柔滑，同酸酸甜甜嘅士多啤梨一齊食，令呢份Strawberry Shortcake整體甜而不膩。
 

開飯仔呢Set仲有Strawberry Yogurt Cream Parfait同Scone，芭菲嘅覆盆子雪芭相當清爽，酸甜果香自然，仲有Éclair同酥皮增加口感層次。鬆餅係店內每日新鮮焗製，外面香脆裡面鬆化，可以用手搣開，點藍莓果醬同用北海道牛奶打成嘅忌廉享用。
 

Afternoon Tea Blend（$68）

香港店用嘅所有茶葉同日本店一樣，嚴選世界各地優質茶葉，沖泡方式亦有嚴謹規定，例如熱茶嘅茶壺、茶杯等會預熱，每壺會有約2.5杯分量。Afternoon Tea Blend由80%印度阿薩姆紅茶同20%尼爾吉利紅茶調配而成，富紅茶芳香，味道甘潤，唔會太濃容易入口。適合配搭任何食物同甜品，紅茶可以配牛奶或者檸檬享用。
 

Chai Tea（$78）

以阿薩姆紅茶沖成奶茶，加入肉桂粉調配成Chai Tea。因為肉桂香味濃郁，建議第一次試嘅話先加少量，再慢慢按自己喜好增加。奶茶口感香滑，同帶微辛香氣嘅肉桂好夾。
 

 

Strawberry Shortcake（$88）

招牌蛋糕Strawberry Shortcake亦可以單點，睇落分量唔細，不過因為士多啤梨、蛋糕同北海道忌廉嘅無論味道定口感嘅平衡都做得好，所以相信女士自私食一份都無難度。
 

Sweet Potato Pudding（$88）

選用甜度較高嘅金時蕃薯，加到每日新鮮烤焗嘅布甸當中。暖嘅布甸上再加焦糖醬同雲呢拿雪糕，一暖一凍形成口感衝擊！布甸口感偏軟，富焦糖苦甜香味，略嫌蓋過蕃薯味道。
 

Mont-Blanc（$88，季節限定）

餐廳會按時令推出唔同輕食同甜品，秋天當然唔少得栗子！呢份Mont-Blanc用咗兩款栗子配搭朱古力，朱古力蛋糕、吉士忌廉、栗子、栗子蓉層次分明，上面以烤胡桃同朱古力珍珠點綴，配黑醋栗醬汁。
 

Green Cream Pasta with Shrimp（單點$118，套餐$148）

餐廳亦有供應輕食，呢碟意粉就喺用日本牛奶製作嘅忌廉汁當中加入菠菜，Creamy之餘唔會太膩，配搭彈牙蝦肉同西蘭花。另附嘅麵包係畀大家點醬汁嚟食嘅，相信男士食完都會夠飽。
 

Grilled Vegetables Plate with Smoked Duck（單點$138，套餐$168，季節限定）

輕食同樣有季節限定款式，呢碟色彩繽紛嘅Grilled Vegetables Plate集合七款鮮烤蔬果，加上烤鴨胸同陳醋醬汁，香味十足。
 

French Toast Sandwich with Smoked Chicken and 2 Kinds of Cheese（單點$108，套餐$138，季節限定）

另一款季節限定推介係呢份法式多士，裡面用咗煙燻雞肉同Gouda Cheese，外面加Parmesan芝士再烤焗至金黃香脆。附上嘅秘製藍莓醬可以按自己喜好倒喺面，中和芝士嘅膩度。套餐會配搭沙律同自選茶飲。
 

餐廳以「spice of a day」為理念，希望令大家可以享受悠閒嘅下午茶時光，平常日子當中增添一點樂趣。新店開幕更有特別活動：Like香港店官方Facebook或Follow佢哋Instagram，再向店內職員出示有「#AfternoonTeahk」同「#AfternoonTeaTEAROOMhk」兩個Hashtag嘅打卡相，就可以得到香港首店限定嘅Tote-bag（非賣品）一個啦！數量有限送完即止。
 

Afternoon Tea TEAROOM（28/9正式營業）
地址：尖沙咀梳士巴利道18號Victoria Dockside K11 Musea B1樓B112B號舖

文：Cathy
相、片：Tom Li