今年彈起嘅飲食潮流，東南亞麵食一定佔一席位！泰式船麵、越南牛河，仲有星馬叻沙都好受歡迎。旺角呢個新商場都有一間新開馬來西亞食店，主打馬拉蝦麵同叻沙，配料有軟殼蟹、龍蝦咁大堆頭！

店名都玩食字「緣蝦壹麵」，舖頭走年輕路線，菜式名都好玩嘢，好似蝦蝦大笑、蝦蝦霸霸叻沙、碼頭勇士肉骨茶等。舖頭主打蝦麵同叻沙，兩款湯底均於中央工場自家熬製，蝦湯以蝦殼、蝦頭等烘乾後磨粉，加入豬骨及雞湯，熬製4小時而成，浸過夜再煲兩小時，全煲都是精華。

蝦湯香氣濃郁，味道甘甜，唔會好假及嗆喉，配油麵同吃好香滑。緣蝦壹麵 ($128) 有半隻波士頓龍蝦、蝴蝶蝦、蜆、青口及魷魚，份量十足。龍蝦雖然唔算大隻，但膏多而且肉質彈牙。蝦麵放上少許自家炒製的參巴醬，味道香辣惹味如XO醬，撈勻一齊食更加香口。

蝦蝦霸霸叻沙 ($88) 同樣有海鮮，仲有原隻炸軟殼蟹，真係霸氣！叻沙湯底椰香及甜味都較重，亦有加入叻沙葉提升香氣。來自緬甸的軟殼蟹有手板咁大，有100克左右，好厚肉。

除咗麵食，仲有唔少星馬小菜，好似麥皮蝴蝶蝦、馬來拼盤、海南雞等。馬來拼盤 ($78) 有炸蝦角、魷魚春卷、香茅雞翼、炸蝦餅及燒菠蘿，食完炸嘢之後食菠蘿消除熱氣。

海南雞飯 ($88)上面放上小魚乾，雞肉軟滑帶微微香料味道，油飯乾身，配上甜豉油、辣椒醬同薑蓉。

米紙卷食得多，呢度嘅竹炭米紙卷係黑色，冇乜特別味但睇落特別。有軟殼蟹、豬頸肉同蝴蝶蝦三種餡料可以揀。

軟殼蟹竹炭米紙卷 $68

辣啦啦係咩？原來讀成「拿啦」，馬拉話解作炒蜆，地道以辣椒醬炒，呢度就用叻沙醬炒新鮮蜆，醬汁佔滿每粒蜆肉好香甜。

辣啦啦 $68

緣蝦壹麵

地址：旺角彌敦道700號T.O.P This is Our Place 4樓406-408號舖

文、相、片：Perrins