最代表香港的八種麵麵麵麵麵麵麵麵

有啲人成日話：平嘢好冇嘢！喺香港地食餐飯，你可以閒閒地畀幾千蚊食鮑參翅肚又得，但係用十零廿蚊食碗麵，都一樣可以食得好滋味！如果我話你聽，以下呢8種麵係最代表到香港嘅麵，你哋服唔服氣先？

雲吞麵

Photos by clarisssssss / 永華麵家
想當年，雲吞麵由廣州紅到落嚟香港，由一班西關大少嘅宵夜變成今日平民嘅恩物。一碗細蓉，三、四粒鮮蝦（豬肉）雲吞、一殼魚湯，浸住幼滑嘅麵線。傳統嘅雲吞麵仲要係人手壓製嘅竹昇麵，爽口彈牙，一咬就斷，夠晒煙韌。

牛腩麵

Photos by Peirina Chen / 九記牛腩

香港傳統嘅牛腩麵係用柱侯醬煮成嘅，不過近年已經慢慢變成清湯腩或者咖喱牛腩，但依然無損牛腩麵喺香港人心目中嘅地位。半肥瘦嘅牛腩，啖啖肉好好咬口，再索晒用牛骨熬製嘅老火湯底，非常入味，麵底彈牙得嚟又有啲油香，鍾意嘅配個伊麵底都係一個唔錯嘅選擇，而同樣索湯力強嘅蘿蔔就成為伴住牛腩麵食嘅最佳食材嘞。

車仔麵

Photos by shuki cheung / 榮記粉麵

車仔麵之所以叫車仔麵，係因為最初喺50年代嘅時候，有好多小販都係推住架木頭車、鐵皮車喺街邊擺檔，車上面有得淥麵同埋即席煮熟埋其他配料，係一種好平民好平民嘅麵食，到後嚟先至慢慢入舖。一碗車仔麵大大碗，抵食就抵食就佢啲餸舖滿晒成個碗，豬紅蘿蔔豬皮牛丸魚蛋牛肚腸仔……缺一不可，而且全部都係平民化嘅嘢食，最多啲牛腩同魷魚貴多少少，但全部合埋一齊就變到好豐富好好食！識食一定係加腩汁或者咖喱汁咁食！

蝦子撈麵

Photos by =架架麵= / 劉森記麵家

而家唔係淨返好多餐廳有蝦子撈麵食喇，用全蛋麵整咗個幼麵底，韌韌der，再加入炒到乾身嘅粒粒蝦子，鹹鹹香香，好有口感，啲蝦子當然愈多愈好啦。就咁淨食一個麵底又得，配餸雲吞又得，點埋蠔油嚟食又係另一番滋味。通常餐廳都會配多碗清湯，等食客食到口乾嗰陣就可以飲返啖湯，再食！

豉油皇炒麵

Photos by 渺渺Mel / 陳根記

通常喺酒樓、茶記、大排檔或者粥舖都可以食到嘅豉油皇炒麵，配菜唔使好多，最簡單嘅就係加一堆韭菜、芽菜、蔥，落鑊連埋生抽、老抽等等豉油炒到佢香一香就可以上碟，當然，加多少少火腿呀海鮮呀咁炒都一樣得嘅。炒出嚟成碟麵都係豉油色，其實已經好夠味，不過有重口味嘅朋友會鍾意落埋甜醬同辣醬撈勻再食，層次又再多多幾重！

炸醬麵

Photos by Benni & 好到底麵家

好多地方都有佢哋自己嘅炸醬麵，而港式炸醬麵主要係用豆瓣酱同蕃茄酱整出嚟嘅，再混埋啲肉絲放上生面頂，撈勻嚟食，辣中帶甜。麵底同樣都係充滿蛋香味嘅全蛋麵多，混醬中嘅肉絲，最好就係唔肥唔瘦，咬落爽口，愈食愈開胃！

公仔麵

Photos by keithkkku & 炳記茶檔

講到香港嘅麵食，點能夠唔提茶記嘅代表：公仔麵。幾分鐘就可以煮熟嘅快熟麵，一向都係快餐同茶記嘅首選。公仔麵好易煮，就咁擺入滾水度淥熟就得，但係要煮得好就都好考功夫，太生或者太熟都會影響到麵質唔夠爽口。公仔麵可以話係百搭，餐肉、腸仔、雞翼、豬扒、雞扒、沙嗲牛肉、五香肉丁、雪菜肉絲、雞蛋、火腿等等點搭都得，除咗湯公，仲可以撈公同炒公仔麵，完勝！

零食麵

最後最後，零食麵絕對係香港嘅長青麵，由你細細個食到而家都仲係咁鍾意食，而家新一代亦都係繼續食緊佢哋，無論喺學校定係公司，口痕嗰陣都鍾意拎返包嚟食。即開即食，鍾意倒出嚟逐條逐條咬又得，成包倒落口過下癮又得，都係咁脆卜卜。係重味精，但真係好好食！

數住咁多先，唔知你最鍾意食邊種。但無論邊種都好，重點係每一款麵食，平得嚟都真係好好食，好有香港嘅味道！喂，你肚唔肚餓呀？煮個麵你食啦~

文: Kar

隨時接收最新資訊
讚好OpenRice專頁！