日本除咗有出名嘅神戶牛、松阪牛及近江牛三大和牛，沖繩嘅石垣和牛近年亦受日本人歡迎，因為石垣牛喺海邊草原自由放養，加上飼料好，可話係食好住好，肉質自然鮮美！所以沖繩有名嘅Steak House 88餐廳專程過江嚟香港開店，將石垣和牛帶畀香港各位高級牛魔！

全店暫時獨沽一味，只供應石垣和牛，以58.5度慢煮4.5小時去處理和牛。點解計得咁精準？大廚話溫度太高會令和牛過熟，溫度太低又好易滋生細菌，肉味亦變質。經過多次試驗後，終於試驗出58.5呢個理想溫度。

和牛88火焰牛扒($288/150g)，餐廳招牌菜，以鐵板上枱嘅牛扒喺食客面前淋上日本60度泡盛，形成火焰牛扒嘅效果。

經過烈酒嘅揮發，牛扒雖然充滿油香，但食落無咁油膩，好多汁，加埋自家製蒜香豉油，正！

燒和牛蓋飯($188)，以日本石川米飯做底，加入8塊石垣後腿牛肉、紫菜、豆苗、蘿蔔苗、水菜、京蔥豉油及芥末沙律醬，再喺上面擺一粒溫泉蛋，非常多料，口感好豐富。

石川米口感煙韌，飯粒分明，加埋少許甜甜哋嘅京蔥豉油提升味道。

飯上鋪咗8塊石垣後腿牛肉，形成小牛山！

和牛88肉盛拼盤($328)，一碟可食到赤身、西冷、雞腿肉、煙肉4款肉類及配菜，跟送一碟3款嘅調味料：鹽、醬油、芥末醬。

餐廳建議進食先後最好由淡至濃，即赤身、西冷、雞腿肉、煙肉。赤身味道好light，油脂味不太濃；西冷最有油香，入面好鮮嫩，外層仲帶點焦香；雞腿肉用嘅係日本產嫩雞，好滑；煙肉好鹹香，都幾juicy。

五款壽司拼盤($198)，一碟有海膽和牛壽司、鵝肝和牛壽司、和牛赤身壽司、和牛大拖羅壽司及燒和牛壽司。調味不多，可畀客人食到最原味嘅和牛。如果嫌味道太淡，可沾一下以薑、柚子、木魚而製成嘅醬油。

呢款香蒜鯷魚熱沾醬($98)，主角唔係在於來自日本嘅蘆筍、生菜、蘿蔔、青瓜等蔬菜，而且暖笠笠嘅醬汁。醬汁用咗蒜頭、鯷魚、橄欖油、牛奶/鮮忌廉而做成，味道微鹹而濃郁，好適合沾清爽嘅蔬菜一齊食，用嚟做餐前小食就最啱。

和牛88
地址：銅鑼灣登龍街28號永光中心13樓

文：Joy