近年大熱嘅巴斯克芝士蛋糕，易整難精。最近有間以巴斯克芝士蛋糕作主打嘅IG網店，首次設立實體店，大賣多款人氣產品，更特設店舖限定嘅迷你4吋版，同埋全港首創嘅CBD口味。加上店主Anjaylia Chan 製作用心，單係芝士都選用咗3個國家嘅芝士混合製成，知佢咩料啦。

Anjaylia自小已經鍾意整蛋糕，半年前將興趣轉成職業，喺網上開設IG店，最近更喺尖沙咀K11 MUSEA開設首間期間限定實體店，主打潮流大熱巴斯克芝士蛋糕。所有蛋糕嘅base都係選用日本雞蛋同牛奶製作，而且更特別挑選日本、澳洲同美國三國嘅芝士混合製作。Anjaylia解釋因為三款芝士各有春秋，日本嘅芝士味較輕但清爽啲、美國嘅芝士味則太重、而澳洲嘅口感就最軟滑，所以三者夾埋一齊拎個平衝就最好。

 鐵觀音巴斯克芝士蛋糕：（左）８吋流心版、（右）４吋soul baby版

除咗原味外，亦有一系列特色口味，特別推介中西合璧嘅鐵觀音口味。加入古法鐵觀音茶粉製作嘅茶味巴斯克，濕潤軟滑嘅芝士蛋糕，滲透住陣陣濃郁嘅茶香，尾段有回甘，而且食起嚟感覺冇咁膩。

　CBD巴斯克芝士蛋糕

CBD巴斯克芝士蛋糕係全港首創嘅口味，喺製作時加入30mg嘅大麻二酚，希望大家喺享受甜品之餘，亦可以放鬆心情、紓緩日常工作同生活嘅壓力。而呢個cake嘅芝士味道重好香添，甜度亦適中。

　另外亦有水果口味，預告嚟緊中秋節會有應節口味推出呢~

Size方面，有大個嘅8吋流心版，亦有店舖限定嘅細細個4吋Soul Baby版，方便大家一大班人share又得，人少少食又得。Anjaylia表示品牌命名為 “soulgood”，係因為希望大家食完之後可以開心啲，同時亦可透過美食同人連結。店舖以粉紅同粉藍為主題色，更特別設有打卡位置添~

Soulgood Bakery
地址: 尖沙咀梳士巴利道18號Victoria Dockside K11 Musea6樓LA601號舖

文、相、片：Kar