日式地道居酒屋 竹家
圖：shin16
米芝蓮車胎人推介，隱藏喺巷仔裡面由日本人主理嘅日式居酒屋，主打嘅係送酒一流嘅串燒。鹽燒雞皮乾爽之餘油潤甘香，牛舌Juicy入味，豚頸肉加Wasabi畫龍點睛。最後記得要試佢地嘅薯仔沙律，唔好以為普通嘢無特別，口感綿密細滑，餘韻悠長，係唔少食家心目中全香港最好食嘅薯仔沙律。小店座位有限，想嚟飲杯酒輕鬆下最好趁早。
平靚正掃街三寶 林記小食
圖：oct.，Voracious
雖然每個人掃街嘅心頭好可能都有唔同，但嚟得呢間小食店，三寶就係魚蛋、腸粉同燒賣。魚蛋係蠔油咖哩汁，微辣中帶少少甜香，魚蛋口感實在彈牙，而且相當入味。滑溜腸粉撈埋落得爽手嘅甜醬、麻醬、辣醬及芝麻，又係無得輸。燒賣都唔係平時食到成口粉嘅嗰種，魚肉比例較高口感比較煙韌。意猶未盡嘅話魷魚同螺肉都可以一試。
新潮湖南農家菜 香湘辣妹
圖：陳珍妮
鐘意食辣嘅朋友仔可以留意一下呢間小館，好久不見酸菜魚名副其實有齊酸、辣、鮮味，開胃之餘魚肉Keep住嫩滑。說好的幸福呢香辣QQ蝦就用蒜蓉蒸Q彈蝦仔，重點當然係墊底吸收哂精華嘅粉絲。想再食辣嘅，可以點東風破剁椒魚頭，一樣酸味同鮮味俱全，辣度可以自己揀，溫馨提示呢道菜嘅辣屬於後勁，越食越過癮定越食越頂唔順就睇個人功力喇。
米芝蓮擔擔麵 詠藜園
圖：為食記
又一間米芝蓮車胎人推薦，呢間傳統川菜館最出名嘅係佢地嘅擔擔麵，唔洗$30就有一碗，用平民價錢就享受到米芝蓮質素。湯底帶濃郁花生香，推介帶少少辣嘅辣味，而且麵條亦幾彈牙。改良擔擔麵仲加咗肉碎喺上面，更香口。花雕醉鷄亦係唔少食家嘅推介，貪佢有酒香得嚟雞肉嫩滑，嗌多籠熱辣辣皮薄多汁嘅小籠包更滿足。
韓式海鮮層層疊 九重鮮
圖：技巧樹熊
入秋天氣漸涼，更加係攞正牌開始試唔同火鍋嘅時機。韓式海鮮蒸鍋舊年開始興起，清蒸除咗可以保留海鮮嘅鮮味之外，亦比烚下烚下嘅傳統火鍋更健康。呢度嘅蒸鍋有三種比你揀：釜山塔，首爾塔同濟州塔，分別係唔同海鮮嘅配搭，最後仲有一個自選粥底。記得每層需要蒸嘅時間都唔同，一邊食一邊計住，咁就保證食到鮮甜又唔韌嘅靚海鮮喇。
茶記平價据扒首選 阿德廚坊
圖：Aki1，紅白男爵
或者每區都有間大件夾抵食嘅港式豉油西餐廳，喺黃埔就係呢間茶記。雖然佢唔單止有豉油西餐，仲有各式炒粉麵飯甚至街坊小菜。但，識食一定嚟食扒餐。鐵板上熱辣辣，牛扒食得出原始口感，唔係一味加醃肉粉嘅過腍，黑椒汁唔夠可以再加。連下午茶嘅黑椒汁牛扒意粉都有兩大塊牛扒配炒意粉，仲有炸雞脾配西多士呢個邪惡組合，好過去連鎖快餐店吖。
隨時接收最新資訊
讚好OpenRice專頁！
