今年各位日式拉麵控真係好忙啊，由年頭到年尾大大話話都唔少日式拉麵相繼抵港。今次就到呢間自2015年起榮獲東京米芝蓮必比登推介、2019及2020更連續兩年勇奪米芝蓮一星拉麵殊榮嘅「金色不如帰」進駐中環，各位拉麵控又多一間要bookmark啦！

金色不如帰由主廚及創辦人山本敦之先生主理，當中最出名就係佢地嘅湯底！湯底堅持自家熬製，而且絕對唔加味精，主打用新鮮大蜆熬成嘅「黃金湯頭」貝汁湯，另外再配埋用100% 北海道產上乘特製小麥粉自家製成嘅拉麵，吸晒鹹鮮嘅湯底～

貝汁醬油拉麵($128)

秘製蜆湯由每日新鮮運送嘅大蜆熬製而成，混合豚骨湯及清魚湯，湯底鹹香帶鮮，而且仲要加上三款廚師自家製醬料，包括黑松露醬、牛肝菌粉及牛肝菌油，味道就更豐富喇。低溫慢煮豚肉片亦腍身入味。

貝汁鹽味拉麵($128)

貝汁鹽味拉麵同醬油唔同嘅係，鹽味加咗秘製嘅白松露油，食落有陣陣松露香氣。除咗秘製白松露油，拉麵表面仲會放上一小撮香草、牛肝菌醬及煙肉碎。

白豚骨拉麵($115)

想食返經典啲嘅口味，呢個白豚骨拉麵就啱晒。豚骨湯底經過最少8小時慢火熬製，湯底同時加入日本醬油及魚介，配上炸紫洋蔥粒及以秘製醬油預先醃製嘅豚肉，湯底好濃厚！

煙熏黑椒豚骨拉麵($115)

呢款就以白豚骨拉麵為基礎，加咗自家製黑胡椒醬油、煙熏豚肉碎及脆炸牛篣條。黑胡椒醬油加入黑胡椒及多種秘製配料，製成特濃胡椒醬油，重口味人士最愛！

豚骨辛拉麵($115)

而愛辣嘅開飯仔就可以試試豚骨辛拉麵，加入自家製特調辛辣醬油及辣豚肉碎，自家製辣豚肉碎預先以多種辣粉，辣椒粒及韭菜混合炒製，食落寧舍開胃～

吉列芝士豚肉棒($70)

豚肉中心釀入大量芝士，再經高溫炸至金黃色。口感香脆，鍾意點芥末醬或沙律醬食都得～

京蔥味噌豆腐

豆腐炸香後，加上大量京蔥及味噌製成嘅醬汁，味道帶甜，又幾有新鮮感。

金色不如帰

地址: 中環港景街1號國際金融中心商場3樓3020號舖

文、相、片: Yanica