東涌對好多人嚟講雖然較為偏遠，但亦因鄰近機場同埋郊區，而成為一眾郊遊者同行山客等喺假日嘅好去處。一場入到去，梗係要搵好嘢食啦。最近有間新開嘅café，走清新簡約嘅日系路線，室內設計以天然木材同園林為主調，氣氛休閒，更有多款吸睛配搭嘅主食同甜品，其中創新嘅壽司塔可就係人氣之選。

 海膽汁蟹肉蟹籽壽司塔可、軟殼蟹壽司塔可

壽司塔可，顧名思義，就係將壽司同taco合體。以一片香脆嘅天婦羅海苔，包住就嚟滿瀉嘅各種餡料同自製嘅壽司醋飯，望落豐富吸引，而且比起一般手卷，更可由頭到尾都啖啖有料。

 日本蟹肉甲羅燒飯配蟹籽及海膽忌廉汁

賣相滿分嘅甲羅燒飯，蟹殼內盛滿蟹膏蟹肉、松葉蟹肉同三文魚子，而橙黃色嘅飯粒係撈埋自家製海膽醬一齊煮，仲夾雜住芝士片同蟹肉。建議食嗰陣將蟹蓋內嘅餡都一次過倒晒落啲飯度，撈勻食，咁就最ichiban啦，每啖都濃郁甘香。不過食晒成碗就會有些少膩感，同朋友仔開心些牙會比較好。

 三色魚生丼

日本珍珠醋飯面放滿三文魚、油甘魚同赤蝦三款分別嚟自挪威同北海道嘅刺身，新鮮鮮甜。

 綠茶芭菲

甜品係點都要留返啲Quota食嘅。特別推介視覺系甜品——綠茶芭菲畀大家。綠茶慕斯、雪糕同脆片等之上，放咗塊半球形嘅香朱古力，當手機ready好晒後，就可以開始將熱抹茶醬倒落去，朱古力會慢慢溶化，抹茶醬流落底層。吸睛度滿分之餘，甜度亦偏高。

 旅者蛋糕

旅者蛋糕共有4款口味，包括朱古力榛子、抹茶同焙茶等。抹茶嗰款最靚，鮮綠色絲絨面，內裡係甘香抹茶慕斯同甜紅豆蓉，食到中間仲有柚子果凍麻糬；至於焙茶味則帶有陣陣茶香，中間夾有日本梨果凍，清新酸甜。

 甜甜酸酸梳打、香桃富士梳打

 休閒木系園林裝潢

QUE  
地址: 東涌達東路20號東薈城2樓284-285號舖

文：Kar
相：Michael