熱狗店最近愈開愈多，熱狗款式亦都愈嚟愈多變。荔枝角商場嘅機舖入面都新開咗間，實行為大朋友小朋友重現「嘉年華」嘅經典回憶咁話。

 南美肉醬芝士熱狗

店內嘅熱狗選用美國豬肉腸製作，多汁得嚟又有咬口，烤過後更有陣陣煙燻味。熱狗主要分為三類：經典熱狗、頑皮熱狗，同無腸熱狗。南美肉醬芝士熱狗參照美加盛行嘅Chili Sauce，以牛肉碎、紅腰豆同香料等自家製作。而芝士亦有幾種，包括mozzarella、車打芝士同芝士醬等，食落係陣陣唔同層次嘅鹹香。

 避風塘熱狗(左)、德國式酸椰菜熱狗(右)

頑皮熱狗，即係用唔同國家風味做靈感嚟創作嘅。例如避風塘熱狗就有微辣嘅自家製避風塘沙律醬，加埋面頭嘅辣椒脆脆同黃金蒜等，係過癮嘅。而德國式酸椰菜熱狗就有滿滿嘅酸紫椰菜，啖啖酸爽，仲有幾塊薯片添。

椰菜花熱情松露狗(左) 、吞拿魚腩蓉牛油果醬狗(右)

唔想食咁多肉嘅朋友，一樣可以食熱狗！兩款無腸熱狗包括吞拿魚腩蓉牛油果醬狗同椰菜花熱情松露狗，後者更適合素食朋友仔添~ 每款熱狗本身都已經有一定嘅配料同醬汁，口感豐富。但如果都仲想要多啲嘅話，可以去到自由添加配料吧，嗶多啲新鮮洋葱碎、黑橄欖 、熱狗醬 、酸青瓜、醃甘筍同葱花等，創出你專屬嘅車仔熱狗。

舖頭同時提供小食同飲品，首推梗係搖搖薯條，四款調味粉都好有新鮮感，好似鹹檸七同喇沙味咁就未試過啦，不過可惜檸七味道唔算突出。

點止冰冰暫時會提供可樂味，另外仲有樽裝奶茶等。

LineUp Hotdog
地址：荔枝角長順街15號D2 Place2樓205號舖Power Play Arena 內

文、相、片：Kar