一向只賣日式甜品外賣嘅日本過江龍清水一芳園，最近踩過界，喺大角咀首次開設堂食cafe，畀客人品嚐甘香而不苦澀嘅京都抹茶。Cafe新增多款抹茶飲品及甜品，蛋糕方面亦見有新作！即刻睇一轉有乜啱食先，Go！

Cafe以深木色傢俬裝潢，加埋淺木色嘅店名牌匾，有種京都老店嘅簡約味道。食物方面，除咗有一貫嘅大福、蕨餅、三色丸子等日式甜品，店子新增設幾款芭菲及抹茶飲品，以及兩款蛋糕新口味。

新出甜品之中，最吸引嘅當然係皇牌一芳園芭菲杯($88)，有咖啡啫喱、呍呢嗱雪糕、朱古力脆脆、抹茶雪糕、紅豆、抹茶忌廉、栗子、白玉、抹茶啫喱及朱古力脆餅，材料多多，賣相又夠靚，影相一流。另有$68外賣裝，size比較細啲，而且少咗個呍呢嗱雪糕。

抹茶忌廉好幼滑，上面仲灑上少許抹茶粉，抹茶嘅甘香減輕忌廉嘅甜膩，不俗；抹茶啫喱味淡，但勝在夠滑溜，配埋紅豆一齊食都幾夾。

原粒栗子軟硬有致，令甜品除咗抹茶香之外，仲添加少少栗子香味。抹茶雪糕係混和咗少許冰碎而雪成，所以食落有少少似抹茶沙冰咁，幾正！

飲品方面，開飯仔推介朱古力脆脆忌廉鮮奶抹茶($46)，將已調配好糖分嘅抹茶粉倒入北海道3.6牛乳之內拌勻，再加入日本忌廉、自家製朱古力脆脆、抹茶粉就搞掂！

抹茶之所以做到咁香滑，係因為用咗日本較為高級嘅浜千鳥抹茶粉，味道香濃，好有回甘又不致於濃得苦澀，果然係高級抹茶。

朱古力脆脆亦係由店子自家製，而且選用意大利朱古力豆慢慢煮出朱古力漿，加入脆脆後再雪至硬身，最後以人手將朱古力脆脆壓得碎粒狀，做法繁複。

至於蛋糕，cafe亦特別設計出兩款新口味。呢款五味抹茶芝士蛋糕($45/件)，入面有抹茶、紅豆、忌廉、乳酪、朱古力，加埋最底嘅撻皮底，有甘香有甜味有酸味又有可可味，味道好有層次感。

厚厚嘅抹茶乳酪令蛋糕不太感甜膩，而抹茶慕絲嘅軟滑口感，同香脆撻底形成強烈對比，亦令抹茶味更突出。

通常朱古力brownie予人感覺好heavy，食幾啖就已經好甜膩。但呢件抹茶布朗尼($45/件)，抹茶味雖然偏淡，但口感比想像中light啲，不太厚實，食落唔會有飽滯感。

小豆抹茶曲奇泡芙外脆內軟，灑上曲奇嘅泡芙令口感更鬆脆，同香甜軟糯嘅紅豆好夾，價錢為$30/個。

而家店子正推行試業優惠，即日起至2月24日，只要客人喺店子Facebook專頁留言「生日快樂」，即可免費獲得日本直送嘅大福，每日限量222個咋！

負責人表示，5月將會供應抹茶軟雪糕，遲下仲會想推出下午茶、all day breakfast等輕食，並且計劃緊喺港島區再開分店添！咁多搞作，抹茶迷一於等睇開飯仔嘅updates啦！

茶匠 清水一芳園
地址：大角咀海庭道18號奧海城2期UG76號舖

文：Joy