早前牛頭角樂華南邨冬菇亭重建，話咁快就已經有新餐廳開業，雖然重建後冇咗冬菇亭風味，但就有冷氣而且環境舒服企理咗。港式麵店撈得囍．麵檔同肉餅哥同一集團，舖位打通但就冇得食對方嘅食物，香港街頭壁畫加埋紅膠燈罩、汽水樽架，感覺都幾懷舊。

餐廳主打雞湯米線，招牌作花膠雞髀雞湯米線，$48大大碗，每碗都有原隻鱸魚花膠，約有手板咁大，一開三至四件。浸發後用雞湯滾熟，厚肉而且重膠質，食完即刻好似白滑咗咁呀。

純雞湯用30磅雞殼、雞腳熬兩個半鐘，煲到淡黃色，一啲都唔肥膩。飲落唔算非常之濃，但有淡淡嘅鮮甜，唔會飲到口渴，似屋企媽媽煲嘅雞湯。

原隻美國雞髀以雞湯及白滷水浸過，size夠大隻，可惜雞肉唔夠滑。埋份量十足嘅江西米線，$48咁大碗都算抵食。

另一招牌為古法蝴蝶腩，蝴蝶腩唔係用味道太濃嘅柱侯醬煮，而係用花椒、八角等香料炒成醬，再炆一個鐘左右。肉質軟滑而且入味，亦食到肉香。

古法蝴蝶腩上湯米線 $32

麵檔都有雲吞麵、牛丸麵等選擇，上湯道係以大地魚、蝦皮、龍蝦殼等熬製，味道鮮香。雲吞麵係自家包製，有大粒蝦肉同豬肉，一碗有六隻，實飽！

鮮蝦雲吞撈麵 $46

餐廳選擇都幾多吓，不過位置就吊腳啲，主要都係街坊幫襯。不過樂華南邨都有唔少打卡位，而且市區冬菇亭已買少見少，影完相再醫肚就最perfect池喇。

撈得囍．麵檔

地址：牛頭角振華道70號樂南華邨熟食亭5-8號舖

文、相、片：Perrins