又有台灣茶飲店登陸香港！今次呢間主打現萃茶湯，用特製萃茶機即席沖泡六款台灣高山茶。而且可以自由配搭屬於你自己嘅飲品，有八款配料、四款配料，唔同糖度同冰量選擇。有選擇恐懼唔知點揀好？即睇開飯仔介紹啦！
 

吃茶三千源自台中，主打六款茶種都嚟自台灣，各有唔同特色同香氣，買之前可以用茶葉罐聞香：松針綠茶帶茉莉花香，水仙桂花富清新花香，玉露青茶自帶自然奶香，鳳眉紅茶味道香醇，凍頂烏龍帶炭焙香氣，決明子紅烏龍揉合決明子微甘芳香。六款茶都得到iTi國際風味評鑑風味絕佳二至三星嘅認證。
 

另一特點係用特別訂製嘅萃茶機即點即泡茶，以三段式沖泡，而且針對唔同茶種，水溫、份量、時間等等都有嚴格控制。唔少配料包括蜜糖、青檸汁、珍珠等都從台灣空運到港，佢哋嘅國王珍珠比一般珍珠大1.5倍，更有咬口。香港比較受歡迎嘅配搭有松針綠茶配百香鮮果（$20+5）同水仙桂花配奶蓋慕思（$20+5）。
 

國王珍珠奶茶（$28）

如果唔知點配搭，品牌亦有八種配搭推介返畀大家，而呢杯係香港同台灣最受歡迎嘅配搭。以鳳眉紅茶配皇家厚奶同國王珍珠，珍珠食落暖暖地，口感偏軟但亦算煙韌。奶茶味道方面紅茶香味比較濃郁，大概係六成茶香四成奶香，但唔會澀口。
 

寶島經典水果茶（$30）

另外呢杯係鳳眉紅茶配水果百匯，有蘋果、青檸、百香果、芒果等，味道自然，酸甜清新。茶底用紅茶代替一般茶飲店常用嘅青茶，飲落比現象中清爽，紅茶後韻同水果亦幾夾。
 

 

決明烏龍奶蓋（$25）

決明子紅烏龍係品牌其中一款比較特別嘅茶種，烘焙嘅時候唔單止加咗決明子，亦加咗少少香草，所以呢杯決明烏龍奶蓋飲落有決明子嘅甘味同香草嘅香味，而且決明子有清肝明目嘅功效！而紅茶淳香加上每日鮮打，厚滑唔膩嘅奶蓋慕思亦有相輔相成嘅感覺。
 

玉露青檸（$25）

玉露青茶味道輕怡，配搭台灣青檸原汁就成為非常清新嘅玉露青檸。飲落先品嚐到青檸嘅香氣同酸味，醒神之餘酸味唔會嗆喉。之後青茶嘅清香就會慢慢滲出。如果鍾意青檸味道嘅朋友，可以試下台灣第二熱賣嘅青檸芬朵西（$27），係用青檸原汁配搭特濃牛乳！
 

麻繩杯套可以代替提袋，環保之餘更有文青Feel

吃茶三千
地址：將軍澳貿業路8號新都城中心2期地下G04號舖

文、相、片：Cathy