夏天就要食雪糕！韓國大熱嘅牛奶雪糕品牌百味堂繼尖沙咀店之後，呢個夏日過海去埋銅鑼灣開期間限定店，新推阿薩姆「奶茶」雪糕、意大利芝士咖啡雪糕等唔同口味。仲有唔少甜品都會喺Pop-up店率先登場，甜魔們唔好錯過！
 

韓國百味堂由1964年成立嘅南陽乳業創立，主打有機牛奶雪糕，嚟到香港開首間分店，仲創下日賣超過1,500杯雪糕嘅記錄！好消息係即日起去銅鑼灣希慎廣場Pop-up店，都食到佢地嘅雪糕！
 

期間限定店獨家口味

阿薩姆「奶茶」雪糕（$68）

當中有兩款口味係Pop-up限定，第一款係由韓國團隊研發嘅阿薩姆「奶茶」雪糕，喺招牌有機牛奶雪糕上面淋上阿薩姆茶，再即磨檸檬皮作點綴。阿薩姆茶仲係逐少即沖，確保茶香得以保留之餘，仲唔會有酸味或者澀味。
 

食落的確有幾濃郁嘅茶香，紅茶餘韻悠長但唔會蓋過牛奶雪糕嘅甜香，平衡得唔錯。估唔到嘅係檸檬皮有種Highlight嘅作用，令雪糕食落多一分清新無咁容易覺得膩。
 

意大利芝士咖啡雪糕（$78）

另一款限定口味係Tiramisu，同樣用牛奶雪糕，今次配搭意式濃縮咖啡、店家自己打嘅Mascarpone芝士同可可粉。佢地嘅咖啡出品亦相當唔錯，可可粉嘅香味亦突顯出咖啡嘅烘焙香同牛奶雪糕嘅甜。配埋芝士一齊食的確有種雪糕版Tiramisu嘅感覺！
 

新甜品率先登場

百味堂咖啡「黑牛」（$65） 

想一次過試到品牌嘅有機咖啡同牛奶雪糕？呢杯「黑牛」就可以滿足你啦。喺凍咖啡嘅冰上面唧上牛奶雪糕，可以先分開飲凍咖啡同食雪糕，之後再搞勻變成牛奶咖啡！加咗雪糕嘅咖啡增添一份甜香，幾易入口。
 

黑芝麻榖物豆乳奶昔（$58）

呢杯奶昔用黑芝麻加豆乳雪糕打成，芝麻香味都幾突出。上面再加杏仁碎、合桃碎、碧根果仁碎同黑脆米，飲落有穀物同芝麻香味，而且顆粒脆脆口感都非常討喜，感覺仲健康啲𠻹。
 

 
麵包及蛋糕推介

軟心牛奶忌廉麵包（$24）

白色菂式賣相相當可愛，真身係有機牛奶麵包加上自家製牛奶醬，未至於爆Cream，但軟心口感都唔錯。牛奶醬係用韓國忌廉、有機牛奶加上雲呢拿籽，甜香適中。因為牛奶醬製作需時，所以每日限量供應呀。
 

牛奶牛油蛋糕（$128）

朱古力牛油蛋糕（$128）

牛油蛋糕每日手製，特點係慢速打發，令蛋糕密度高而口感鬆軟。原味富牛油香，而朱古力蛋糕就用坦桑尼亞75%朱古力，朱古力香濃郁。
 

（左）香軟牛奶雪芳蛋糕（$128），（右）朱古力雪芳蛋糕（$128）

同樣每日新鮮製作，雪芳蛋糕口感會比牛油蛋糕輕盈。牛奶原味帶輕柔牛奶甜香，朱古力味就帶可可濃厚餘韻。
 

百味堂（期間限定店）
日期：即日起至2018年9月30日
地址：銅鑼灣軒尼詩道500號希慎廣場1樓中庭

文、相、片：Cathy