各大酒店都為聖誕節主題絞盡腦汁，旺角呢間酒店自助餐好有新意，以愛麗絲夢遊仙境做自助餐主題，除咗有聖誕經典火雞、港人必like嘅任食生蠔龍蝦，最特別就係各款Alice in the Wonderland嘅蛋糕、甜品杯，靚到唔捨得食架，即刻睇睇！

聖誕經典烤火雞

聖誕食火雞，先算係應節。呢道香草蘑菇蓉焗釀火雞用慢燒方法處理，連同蘑菇、栗子、雞肝等配料一同燒製，足足燒咗兩日先新鮮出爐，以免火雞肉因太猛火而嚡口或過韌。另可配搭金巴利汁或雞肝燒汁同食味道更佳。

任食生蠔

生蠔吧會供應美國、愛爾蘭兩國生蠔，由廚師每日即開生蠔，夠新鮮。旁邊仲有7款醬汁，有辛辣海鮮汁、辣椒豉油、檸檬汁、檸檬角、乾蔥紅酒醋、薑味木瓜醬及紅淅醋。

呢款美國Island Pacific生蠔好肥美，海水味不太濃，但味道亦算鮮甜。

至於愛爾蘭生蠔，海水味較濃，蠔肉亦比較爽口。

其他冰凍海鮮

除咗生蠔，另外仲有5款海鮮，包括：龍蝦鉗、松葉蟹腳、青口、凍蝦及墨魚仔。

刺身壽司

餐廳供應三文魚、八爪魚、吞拿魚、魷魚等刺身，最特別嘅係，今年餐廳安排每晚兩場嘅即切原條油甘魚刺身，即切即食，好新鮮。而且，餐廳亦供應創意壽司──「甜酸苦辣壽司」，即草莓蟹籽海老壽司、梅子赤貝沙律壽司、火炙甘味吞拿魚壽司及火炙香辣三文魚壽司。

即燒牛肝菌香草醬火炙波士頓龍蝦

廚師將龍蝦放上烤爐，並喺龍蝦肉上塗滿牛肝菌香草醬。

然後加入牛肝菌粒粒，就用火槍燒香龍蝦而成。

呢道牛肝菌香草醬火炙波士頓龍蝦，肉質彈牙嘅龍蝦配以濃郁嘅牛肝菌，好正，加上即場燒製，面層仲有少許焦脆添！

其他鹹食

呢道三式胡椒烤豬小腿用黑胡椒、青胡椒及紅胡椒一同醃製豬小腿，然後搽一層糖漿烹調而成，味道微辛但惹味。

自助餐常見嘅即切牛扒，一樣有得食，可搭配燒烤汁、黑椒汁及燒汁。

愛麗絲主題甜品

如果你係甜品控，記住一定要留肚留肚留肚，因為單單甜品就已經有幾十款選擇，勁豐富。

愛麗絲主題蛋糕造型生動，好神似，有（左）聖誕菓子蛋糕，將金提子乾、黑加侖子乾、橙皮、檸檬皮、杏仁等材料浸喺白蘭地酒，再製作成含黃莓果醬嘅油底蛋糕；（右）榛子朱古力蛋糕，內裏有三層口感，第一層係帶點微苦嘅70%朱古力蛋糕，第二層係同樣以70%朱古力炮製嘅軟心朱古力，第三層就有榛子杏仁脆脆。

左邊嘅聖誕樹頭蛋糕，造型以《愛麗絲夢遊仙境》故事中追逐白兔先生嘅情節，而蛋糕入面有蛋糕內是以酸車厘子、朱古力蛋糕、朱古力慕絲及車厘子酒忌廉，再配以旁邊配上愛麗絲糖膏公仔、糖霜脆餅蘑菇及綠茶蛋糕碎草叢作裝飾；右邊嘅紅菜頭棒棒蛋糕，入面有用新鮮紅菜頭搾汁而成嘅牛油蛋糕以及紅菜頭軟心朱古力。

雪糕就用Movenpick品牌，有tiramisu、熱情果香芒雪葩、楓糖合桃、冧酒提子、意大利奶凍、呍呢嗱、士多啤梨及瑞士朱古力共8款口味。

旁邊仲有廿幾款配料，有水果有彩針有醬汁，小朋友見到實開心。

另外仲有乳酪添，分牛奶、士多啤梨兩款口味！

水果吧都有4種選擇：西瓜、菠蘿、蜜瓜及火龍果。

聖誕節果然特別豐富啲，除咗有buffet美食之外，喺12月24日平安夜晚上7點半至8點時段，餐廳仲邀請到李紫昕Purple姐姐即場獻唱架！

自助餐價錢

注：凡於平安夜、聖誕節、拆禮物日及除夕夜惠顧花月庭自助晚餐，每位客人可免費預約體驗10分鐘FaceFit皮膚護理服務並獲贈Dermalogica護膚體驗套裝及購物優惠券乙張(價值HK$552)。數量有限，送完即止。

花月庭
地址：旺角太子道西193號帝京酒店2樓

文：Joy