嚟到年尾，當然唔少得要食返餐好嘅嚟慰勞一下辛苦咗一年嘅自己啦。呢間11月新開嘅西日Fusion餐廳無論同朋友定同事去都咁啱。一嚟有西日菜式任揀，二嚟呢度嘅海鮮係由老闆直接攞貨，選擇更多元化總有一款啱食！
 

御家由兩兄妹Calvin同Debbie一齊打理，因為家族經營海鮮批發生意，餐廳可以直接向供應商取貨，攞到唔同地方新鮮又特別嘅海產，例如嚟自澳洲深海肉甜多膏嘅水晶蟹(Snow carb)。而且餐廳門口就有個大魚缸，當日有咩生猛海鮮，想揀邊隻蟹全部一目了然。
 

北海道鱈場蟹三食（時價）：香燒鱈場蟹腳

冬天係食日本蟹嘅好季節，呢度就搵到北海道三大名蟹之一鱈場蟹。燒蟹腳用到嘅秘製蟹汁當中包括蟹膏同蛋黃醬，所以食落啖啖蟹膏鮮甜但又會覺得過膩。而且新鮮鱈場蟹肉一絲絲嘅口感真係特別誘人！而三食嘅另外兩食係𩶘魚湯野菜火鍋同蟹膏泡飯，特別係火鍋用上燒𩶘魚加上蟹肉煲湯，鮮味滿嘴。
 

加拿大龍蝦火焰芝士三重奏（$398）

三重奏係指用咗三款各有特色嘅芝士，煙韌柔軟嘅水牛芝士令龍蝦有少少拉絲效果，Gruyère芝士味道濃郁。而Parmesan芝士比較硬身，所以淋上Rum酒燒過之後，就會形成一層香味十足嘅芝士脆片！龍蝦肉爽彈，略嫌韌咗少少，但龍蝦鮮味同芝士香依然係無得輸嘅配搭。
 

磯煮南非鮑魚配鮑魚肝醬（$118）

唔單止主菜，前菜小食餐廳亦一樣用心，鮑魚口感彈牙唔韌，磯煮已經相當入味，再點用鮑魚肝特製嘅醬汁就增加咗一重內臟嘅微鹹鮮味，淺嘗就足以令人印象深刻。
 

 

炙燒左口魚邊壽司（一人前或二人前套餐）

新鮮嘅海鮮當然唔少得用嚟整刺身或者壽司，呢件炙燒左口魚邊壽司係餐廳嘅特別推介。雪白嘅左口魚肉有豐富魚油，用火槍炙燒將魚油逼出嚟，食落油脂香重但唔膩，而且魚肉口感偏軟稔，更有入口即溶嘅感覺。
 

黑松露脆脆薯條（$68）

餐廳仲有兩間VIP房，就算飲少少酒都唔怕嘈到其他人。無論你嗌紅酒定清酒，都總唔少得送酒小食嘅，佢地有齊日式嘅熒光魷魚沖漬、鹽燒牛舌，同西式嘅吉列炸蠔、即開進口生蠔等選擇。不過開飯仔就想推介呢碟黑松露脆脆薯條，薯條炸至外脆內軟，而且唔單止薯條外面沾滿一粒粒黑松露，連個醬都有黑松露，黑松露Fans一定滿意！
 

御家
灣仔皇后大道東202號QRE Plaza 26樓

文、相、片：Cathy