老麥呢期玩阿華田，開飯仔面書都同大家做過試食報告，睇下阿華田味新地筒、新地同麥旋風味道如何。原來McCafé嗰邊都有響應，出咗兩款阿華田窩夫，一隻配雜莓，一隻配阿華田脆脆，每款$38。不過得金鐘海富中心、太古城中心、鰂魚涌海灣街三間分店供應。

我就試咗後者，如圖所見，窩夫上面有勁大Pat阿華田雪糕，但就唔見有朱古力醬，旁邊灑滿阿華田脆脆，賣相係吸引嘅。食落非常之重阿華田味，脆脆增加口感，可惜得一塊窩夫，雖然可以滲滿雪糕，但有啲唔夠喉，整體嚟講值得一試。

另外，原來McCafé都有加入芝士撻戰團（好似有啲遲），宣傳中稱有流心效果，但真實切開就未見有流心，但芝士都係半凝固狀態嘅，食落有啲失望，芝士味偏酸，未夠香口，而且價錢同出面龍頭店有得揮，成$20個，性價比相對低。