好多人因為基隆茶餐廳喺新年向長者派發一人前盆菜、糕點、雞蛋而認識佢。但其實早於20年前，老闆Cat 姐已加入露宿者行動委員會擔任義工，向露宿者派飯。

除咗新年，剛過去嘅元宵節都有派發200份一人盆菜及贊助食物物資，公公婆婆都開心地一袋二袋。
圖：基隆茶餐廳Facebook

多年嚟，每逢星期三下晝5點就向有需要人士派飯，家常小菜營養均衡，有時仲煲埋涼茶㖭。疫情下亦派發逾萬防疫包，令露宿者都有足夠防疫物資。

逢星期三都會派飯畀老人家同有需要人士，風雨不改。
圖：基隆茶餐廳Facebook

寒冷日子更貼心地送上暖包。
圖：基隆茶餐廳Facebook

近日疫情嚴重，派飯外仲有快速核測包、餅乾、福米、水果蔬菜。
圖：基隆茶餐廳Facebook

善心可以感動更多人一同行善。剛過去嘅周三派飯日，就有善長贊助捐贈蝦子麵、口罩；又有香港品牌送贈水耕菜，閒時又有銀髮族自薦幫忙做義工派飯，將善心延續落去。疫情令唔少人手停口停，當自己有能力時可以學Cat 姐咁幫得就幫，用生命影響生命。

經常有善長捐贈物資，延續善心。
圖：基隆茶餐廳Facebook

基隆茶餐廳共2間分店，價錢貼地。食客推薦西多士、芝士撈麵、胡椒豬肚湯飯、即叫即蒸嘅蒸魚餐等。而家仲有抗疫套餐會分區開團免運費，有雙冬羊腩煲、麻辣雞煲等選擇，並可配1款小菜如香煎蓮藕餅、菠蘿咕嚕肉、魚香肉鬆茄子煲等，可留意佢哋社交平台嘅最新動向。

餐廳會分區開團免運費訂抗疫套餐。
圖：基隆茶餐廳Facebook

基隆茶餐廳
地址: 太子界限街24號地舖

文：KateLuk