荃灣人有口福了！荃灣最近開咗好多間新餐廳，食都唔食得切嘅時候，又有間人氣名店進駐喇！講緊嘅係嚟自日本名古屋嘅班戟品牌，Pancake House HoiHoi！佢哋上年喺九龍灣開嘅第一間海外分店，日日都大排長龍，今次新店仲要帶嚟3款期間限定嘅鹹甜點，相信一定會瘋狂吸粉呢！

 沖繩紫薯梳乎厘班戟

首先要介紹嘅係由外到內到返外都咁吸引嘅沖繩紫薯梳乎厘班戟，一條條2mm幼嘅紫薯茸條蓋住晒2層招牌梳乎厘班戟，再放上士多啤梨片同甜栗伴碟，單睇賣相已經心動。紫薯茸係100%使用來自沖繩縣農場嘅紫薯製作，店方再加入Mascarpone芝士同少量蜜糖調味，口感軟滑，味道濃香，係食得出嘅真材實料，最值得欣賞嘅地方係佢唔會太甜呀，感覺冇咁膩，要自己一個人霸氣咁食晒都冇問題。

另外2款則係創作系嘅班戟漢堡，日本總店都係前排先新出嘅。以夏威夷班戟代替麵包，夾埋豐富餡料做成漢堡，夏威夷班戟嘅口感相對梳乎厘班戟厚實但鬆軟，帶有麥香、牛油香同蛋香，當做漢堡包咁食都幾夾。

 夏威夷牛油果大蝦班戟漢堡

牛油果、大蝦混埋蜜糖芥末醬，感覺清新開胃，牛油果仲好creamy添，幾有驚喜。要提一提啲薯條，連埋薯皮炸，好脆口呢。

 夏威夷芝士班戟漢堡

加入牛肩肉製成嘅漢堡，係自家手打製作，有咬口得嚟亦有肉香。舖面嘅半溶芝士混入埋焦糖洋蔥，令到成個漢堡食落都好有層次。

 牛奶抹茶

Pancake House HoiHoi
地址: 荃灣楊屋道1號荃新天地1樓117號舖

文、相、片：Kar