講到湘菜，即係湖南菜，香港地選擇唔算多，講到正宗就真係少之又少啦。將軍澳最近就有一間新嘅湘菜館開幕，大廚喺內地有多年烹調湘菜經驗，味道夠晒正宗，鍾意食辣或者想一解思鄉之情嘅朋友要去試吓！
蒸氣剁椒魚頭($388)
剁椒魚頭可以話係湘菜嘅代表，一上枱外表已經贏咗，畀濃濃嘅蒸氣包圍住。師傅嚴選鮮美魚頭，以湖南特色紅、黃剁椒同其它調味料一齊蒸熟。魚頭肉質嫩滑、有齊酸、辣、鹹同鮮味！為咗唔好浪費啲汁，建議點個陽春麵連汁食，陽春麵掛晒汁，有濃濃椒香好惹味。
乾鍋茶樹菇羊肚菌(大$348/小$228)
以湖南家常菜乾鍋茶樹菇為基礎，再加入珍貴菌類羊肚菌，惹味有鑊氣。而且有好高嘅營養價值，係養生之選啊！
壇宗酸菜魚($188)
喺香港食酸菜魚都幾多選擇，不過多數都係川式口味。呢度嘅酸菜魚就係湖南口味，用上湖南直送嘅香料同老壇酸菜，又酸又辣又麻，魚肉嫩滑，送飯一流！
長沙臭豆腐($68)
呢款內地常見嘅街頭小食喺香港真係好少見到，呢度就有得食啦～豆腐炸得外脆內軟，重點係真係夠臭㗎！食時記得喺中間篤個窿先點汁，醬汁就會滲透入豆腐到啦。
燒辣椒皮蛋($48)
皮蛋上佈滿紅紅嘅辣椒，每食一舊都有濃濃辣椒香～
地址: 將軍澳唐俊街12號天晉滙1樓120-121號舖
文、相、片: Yanica