平時食omakase平極都有個普，不過尖沙咀最近就開咗間日式居酒屋價錢就好親民啦，最平$288就食到師傅主理嘅串燒omakase，都咪話唔抵啊！食材大部份來自日本，如沖繩黑豚、鹿兒島薩摩赤雞、岡山千両茄子同日本白蔥、韭菜、冬菇。

Omakase 分咗三個價錢，分別係$288、$428同$688，$288包括前菜、串燒6串、一份煮物同湯，而$428就多兩串串燒、燒物同燒飯糰，$688除咗以上嘅野，總共有12串串燒同多一款海鮮食添！其實正常食量嘅話叫個$428已經好夠飽～串燒由明師傅親自發辦，明師傅曾經喺多間日式料理店做，有差唔多二十年經驗。佢話燒串燒嘅技巧就係一定要有耐性！

所有串燒先落海鹽及柚子粉調味，黑豚肉表皮燒到脆一脆，油香重，但食落去唔會覺得好漏。燒雞尾難得無騷味，師傅話串雞尾都好有技巧，要一左一右咁串先會燒得靚！

白鱔燒到外脆內軟，另外落咗啲山椒粉去吊味。

雞肉棒入面有啲軟骨，口感更加豐富，點埋個蛋黃汁食更加滑。燒雞肉棒嘅時候師傅會加三次雞汁令佢更入味。而個雞汁係師傅用原隻雞加豉油、味淋去燒出嚟。

食得太多肉，其實都有大量燒蔬菜類。好似白蔥、冬菇、青椒仔、千両茄子、韭菜同白菌等，全部燒完都仲好juicy，唔會燒得過乾。私心推薦燒韭菜，鹹鹹香香好惹味！

除咗串燒外仲有啲煮物同燒物，例如百香果黑豚肉、燒魔鬼魚同燒飯糰等。百香果黑豚肉肥瘦均勻，煮到入哂味。另外鐘意食飯焦嘅唔可以錯過燒飯糰，燒到個皮勁脆！

海鮮茶碗湯加左蜆、螺、魚、雞肉、雜菌同銀杏，加啲青檸汁的話會令鮮味更突出。

居酒屋另外仲提供午市定食，如安格斯牛小排定食($128)同馬友一夜乾定食($128)，包埋前菜、湯、沙律，以質素嚟講都係一個抵食之選！

黑木

地址: 尖沙咀金巴利街8號地下2號舖

文、相、片：Yanica