誰能抵抗糖果嘅魔力呢？呢間喺金鐘新開嘅法式糖果店，有成超過70款糖果朱古力，非常多選擇，糖果仲會用一個個正方透明小盒子裝住，齋睇未食都流晒口水！睇睇究竟有乜口味選擇先！

品牌由法籍糖果專家Olivia Niddam創立，曾經喺Jean-Paul Hévin Chocolatier、L'éclair de génie等名店工作，今次係第一次建立自家品牌，特地從法國引入超過70款不同種類嘅糖果，當中有主打朱古力系列、水果系列，甚至有“Guilt Free”系列添！

Guilt Free系列嘅Five A Day不含乳糖及明膠，連全素者都啱食架！

開業只有一個星期，但呢款味道辛辣嘅「辣擊心臟」非常熱賣，聽講存貨都清得七七八八。入口時味道香甜，但之後辣椒同薑嘅辛辣感好強勁，辣度媲美某米線店嘅中辣，非常強勁。

大走粉色系朱古力，有粉紅、粉藍、淡黃色3款，可以送畀啱啱出世嘅BB仔。

開飯仔就最鍾意酸味系列，有混合咗蔬菜汁嘅Fairy Tale Bears、Peach & Love 以及呢款造型似西瓜嘅Watermelon Kick，食完好醒神。

禮盒分兩款size，一款可放到3盒糖果，一款可放到8盒糖果，而且仲可以自選超過20款貼紙、絲帶去DIY禮盒架！

新張期間，仲有3款好sharp好搶眼嘅特別禮盒添！

Olivia仲親自設計咗10款代表不同系列糖果嘅公仔，造型充滿諧趣，有(左)代表懷舊風味嘅Monsieur B、(右)代表辛辣、酒味嘅Gigi 。

仲有節日限定嘅Sparkle and Pop Bob系列，嚟緊11月即將會推出聖誕限定嘅糖果喇！ 

The BonBonist
地址：位於香港金鐘道88號太古廣場二樓200E店

文：Joy