小黃鴨B.Duck嘅Fans注意，香港第一間B.Duck & Buffy茶樓日前正式開張啦！唔單止裝修同擺設都見到B.Duck同妹妹Buffy嘅身影，就連點心都係得意B.Duck造型，必點爆漿效果突出嘅流沙奶黃包。點心平均水準都唔錯，可以相機食先之餘仲滿足口福。
 

B.Duck & Buffy茶樓位於旺角彌敦道，係香港第一間常設B.Duck主題茶樓。店內有唔少B.Duck香港特色嘅插畫，仲有鳥籠、霓虹燈等懷舊特色裝飾，最得意嘅要數到浮喺半空坐喺蒸籠當中嘅B.Duck，打卡位真係多到數唔完！
 

流沙奶黃包（$32/2件）

流沙餡用鹹蛋黃、牛油、砂糖製作，鹹香味同甜味平衡。最重要係包身鬆軟得嚟夠煙韌，加上流沙漿真係夠「流」，無論係搣開個包定就咁篤個窿，都會立刻好似熔岩咁流出嚟！不過亦因為好爆漿，畀小朋友食嘅話要小心太熱呀。
 

招牌奶黃包（$32/2件）

招牌奶黃包同樣係Buffy，由小黃鴨改為熊貓造型一樣趣致！少咗鹹蛋同爆漿效果，奶黃餡味道香甜口感柔軟。
 

火焰叉燒包（$32/2件）

叉燒包就換上B.Duck造型，雙眼係火焰圖案好搞笑。蜜汁叉燒香味十足味道帶甜，趁熱食就最啱。
 

蝦餃王（$46/3件）

晶瑩剔透嘅蝦餃加上B.Duck感覺更加可愛，半透明蝦餃皮薄得嚟唔會一夾就散，裡面嘅蝦肉同豬肉鮮甜爽脆。
 

 

Buffy蛋撻（$16/2件）

Bite Size酥皮蛋撻上面有Buffy圖案，酥皮脆而唔油膩，裡面蛋漿略甜，如果蛋香再突出啲會更好。
 

B.Duck泡泡楊枝甘露（$36）

港式甜品楊枝甘露呢度亦有供應，芒果、柚子同西米夾起嚟味道酸酸甜甜而且口感豐富。最得意嘅係有立體B.Duck啫喱喺中間，係咪諗起細細個陪大家沖涼嘅小黃鴨公仔呢？
 

拿鐵咖啡（$28）

茶樓除咗傳統點心，亦有近年大熱嘅芝士奶蓋茶同咖啡供應，而且上面會有可愛B.Duck & Buffy Latte Art！
 

B.Duck & Buffy茶樓
地址：旺角彌敦道575號Ladder Dundas 1樓

文、相、片：Cathy