食鐵板餐第一時間諗起港式西餐、快餐店同日本連鎖店？位於佐敦酒店food court內的嘅混乱STEAK係最新一員。舖頭由拉麵陳Meter Chen開設，所以都係日式路線，最特別嘅係牛肉係逐gram計錢，食幾多買幾多！
先揀肉眼、牛柳定西冷部位，產地不時轉換，今期肉眼同牛柳係巴西貨，肉眼最平只售$0.26/g，而西冷就係美國安格斯，所以價錢$0.49/g都會貴少少。牛肉全部經過3日乾成熟成，肉質更軟嫩肉味更突出。
然後就柯打份量，300克起，最平$78有交易。師傅立即手切大約份量，因為全靠師傅肉眼同經驗，所以都會有少少誤差。當然如果太多太少，亦可要求師傅再切過。最高紀錄有人試過食800克，超巨型！
煎扒用上自家提煉牛油煎製，加少少鹽及胡椒調味，留意只會提供medium rare及全熟，所有牛扒仲會煎兩次，煎完第一次後再rest兩分鐘，再輕煎放上鐵板。
鐵板可以揀蒜蓉、洋葱及青葱做配料，仲可以揀正常、一倍至三倍份量，唔使特別加錢，梗係好貪心咁要三倍啦！蒜蓉係Meter 旗下拉麵店名物，做法一樣，由蒜頭、麻油及牛油製成，超香口，但食完個口就唔多香喇。
相中西冷約有330克，約有半吋厚切，即大約$162，咁大塊算抵食！肉味濃而且富油香、質感有咬口，不過西冷有條脂肪位，如果唔鍾意太肥，不妨選擇肉質腍身嘅牛柳或者肉眼。
牛扒會跟一款自家調製醬汁，唔係港式黑椒、蒜蓉汁，而係和風柚子酸汁，加咗蘿蔔蓉、紫蘇、醬油等調製，酸度唔算高，配牛肉食冇咁膩。
套餐仲跟沙律、白飯及味噌湯，真係好飽！建議一般人揀300克已經足夠，以下係400克肉眼扒，厚切扒真係好巨型吓，自問食肉獸先至挑戰更大份啦！晚市時間未開門就已經有人龍，想食真係要早啲去。
地址：佐敦彌敦道380號香港逸東酒店LG樓5號舖
文、相、片：Perrins