夏天總係熱辣辣熱辣熱辣辣好熱好熱，然後愛辣嘅朋友就會遇辣愈辣。有Pizza店就趁住呢個時勢推出咗一個勁辣Pizza同4款辣辣小食，召喚一眾辣椒仔女去挑機。

呢個「好狠辣」Pizza係薄批嚟嘅，就咁睇個樣，咪又係普通pizza一個，有牛肉、有芒果喺上面，睇唔出有幾辣。不過拎上手，聞一聞，就開始知道有料到了。再食一啖、兩啖、三啖，OMG！條脷開始麻喇，再慢慢滲到落喉嚨，有啲㷫。初初有料佐住食都還好，去到最尾啲邊邊位，得返啲醬，就係打大佬嘅時間喇！脷測，應該等於譚仔嘅大辣，就連食得下辣嘅開飯仔，都唔可以一鼓作氣咁食晒件pizza，必須抖一抖，飲下嘢，回一回氣先再繼續食到呀。

究竟點解咁辣嘅呢？原來係師傅特製嘅醬汁呀，係由指天椒啦、香茅啦、檸檬葉、薑、香蒜等等加埋一齊而成。

另外幾款小食辣嘅程度就相對嚟講輕好多喇。其中特色香草雞肉串燒伴葡萄葉包蕃茄飯，外形都幾有氣勢，記得要點醬食，辣汁中滲有椰香，雞肉本身就有中東香料味，辣得嚟夠香。其餘仲有水牛城雞翼、炸魚墨西哥捲餅等等。

要解辣都唔係冇辦法嘅。叫返杯Corona Beerita，啤酒倒插喺鮮果沙冰上面，可以揀插一支或者三支，係霸氣嘅。果汁有紅綠黃三款揀，分別係士多啤梨加西瓜加紅莓、蘋果加青蘋果加青檸加薄荷，同埋香蕉加菠蘿加熱情果。

Wildfire
分店地址

文、相：Kar