十月係屬於大閘蟹嘅月份，facebook同IG係咁keep住畀大閘蟹洗板。有啲人鍾意出去食，有啲人鍾意買返屋企自己整嚟食，你係邊種人都好，開飯仔都幫你哋搵咗5間蟹舖喇！

上環老字號  廣隆行

圖：肥妹愛美食、stellashea

正所謂「九月圓臍十月尖」，嚟到10月食大閘蟹，就要揀雄蟹喇，夠鮮夠肥。上環呢間老字號，賣嘅都係太湖大閘蟹，蟹肉都比較厚身、實淨，大部分仲會有蟹膏添！新手嚟買蟹都唔使驚，呢度會送埋張卡仔畀你，有晒蒸蟹教學㗎喇，返屋企照住蒸就得。

買返屋企自己搞  朱耀記大閘蟹專門店

圖：麦卡顿（左）

呢間喺荃灣嘅專門店，好多年㗎喇，老字號嚟，賣嘅主要都係由江蘇、太湖空運到港嘅大閘蟹，有大有細，大部分都幾多膏下。特別而家10月，識揀一定揀母蟹。買完返屋企蒸十零廿分鐘就食得。

多款大閘蟹菜式  大公館

大閘蟹除咗原隻食，呢間餐廳就將佢拆件，利用大閘蟹做食材，融入其他嘅中菜同點心度：蟹粉小籠包、蟹粉鮮蝦雲吞、蟹粉生菜煎菜肉包、水晶蟹粉肴肉、蟹粉魚翅釀鳳翼、金湯乳酪蟹粉杯、蟹粉桂花炒魚肚、珊瑚蟹粉龍蝦球、太極蟹粉金絲綠柳、鮮拆蟹粉豆腐同蟹粉龍蝦湯擔擔麵等等，總之就係蟹，全部都係蟹啦！

酒店任食原隻大閘蟹  帝苑廳

大閘蟹迷全盛時期可以一次過食幾多隻大閘蟹？嚟返次大閘蟹任食數下囉。呢間酒店嘅任食宴，總共提供4款煮法嘅大閘蟹：原味清蒸、鹽焗、油鹽水浸同原隻避風塘炒，你食得落嘅食幾多都得。原味當然食到最鮮最原始嘅味，但新製法嘅避風塘炒好香口，完全係另一種風味。套餐仲包埋蟹肉腿茸雪燕羹同埋薑茶，咁就唔怕太涼啦。畀多15蚊就可以食埋西班牙火腿焗大閘蟹蓋，鹹香味中滲出蟹鮮味，已經流緊口水？Sorry，仲未講完，餐廳仲有其他蟹菜式：蟹粉鍋鈀、蟹粉薑粒炒飯等等，留定quota啦你哋。

「任食大閘蟹盛宴」
日期：即日起 至 30/11
時間：6:30pm – 10:00pm
訂座：2733 2008

5款大閘蟹任食  紫粵軒

圖：Bur

刷得嘅大閘蟹迷，Attention please！酒店任食大閘蟹，500蚊有找！細細隻大約4-5両重，咁可以食多幾款嘛，事關呢度有5款口味揀：清蒸啦、冰鎮黃酒啦、風沙啦，仲有新嘅籠仔荷香蟹粉糯米蒸同燕窩蟹粉蛋白蒸釀大閘蟹蓋，其中糯米蒸嗰款啲糯米用酒糟爆香過先，再加入蟹粉、蟹肉、蟹油、花雕等等撈勻蒸熟，隻蟹又另外蒸熟，之後就將飯釀入蟹蓋砌返隻蟹形出嚟，用荷葉包好再蒸，所以除咗食得出蟹嘅鮮味，仲有陣陣荷葉香味。聽講booking都幾full，想食就快。

「大閘蟹 膏瘋會」
日期：即日起 至 30/11
時間：6:30pm – 10:00pm
訂座：3983 0660

最後，溫馨提示下，大閘蟹雖然好正，一年都係得呢段時間可以狂食，但寒涼呀，食得有節制之餘，最好配埋薑糖水一齊飲啦。