而家好多朋友仔食嘢都好高要求，好食係基本，好睇係bonus。金鐘新開咗間日本料理速食店，主打即叫即製嘅壽司、丼飯、定食，個壽司拼盤仲要有雲霧效果，靚到呢。

呢個特上雲霧雜錦壽司拼盤，有10款壽司，包括最多人鍾意嘅海膽呀、牡丹蝦呀、帆立貝呀等等，全部都好鮮甜，而壽司米係用咗山形縣嘅生拔米，粒粒分明，黏度同米香十足。溫馨提示，叫咗呢個拼盤嘅朋友仔，相機記得隨時ready，一嚟就好影咗先啦，事關佢以乾冰營造咗啲雲霧效果，成碟嘢都好有仙氣咁，但啲雲霧好快就會消散晒咯。

鍾意食蔥嘅話，見到呢碗蔥爆吞拿魚溫泉蛋丼就實變bling bling眼。真係成碗都係蔥呀！中間有吞拿魚蓉同吞合魚刺身，再包住隻溫泉蛋，又係賣相精美嘅friend。輕輕篤穿隻蛋，啲蛋汁流出滲入飯中，治癒、香口。

另一個爆多料嘅選擇係鰻魚櫻花蝦炒飯，今次舖滿嘅唔係蔥，而係櫻花蝦！條鰻魚仲要係用鐵板炒製過嘅，零舍鹹香。留意返要5點後先有得食，lunch冇啊。

日式鱲魚粥鍋嘅粥底以鱲魚頭、大根等材料熬製3個鐘，再加入秋葵、粟米粒等，味道鮮上加鮮，而且仲可以選配鱲魚刺身、帆立貝刺身或者五色刺身，啲刺身就咁食又得，放入鍋度輕輕淥4秒先食又得，不過都係5點後先有得食。

飲品方面，有掛杯嘅黑糖抹茶鮮奶同柚子冰茶。前者甜而後者清新，仲有粒粒柚肉同柚皮食到，各有各fans。

 北海道3.6牛奶千羽鍋（5點後供應）

 飛驒和牛漢堡咖喱定食

千羽堂
地址：金鐘夏慤道12號美國銀行中心地下G4號舖

文、相、片：Kar