珍珠奶茶熱潮未減退！銅鑼灣呢間新開嘅茶飲店主打手工珍珠，每日新鮮製造唔同口味，包括期間限定嘅榴槤珍珠！全部都含有膳食纖維，而且所有飲品都可以免費配搭一款珍珠，啱哂珍珠控呀。
 

Just Bobba開喺銅鑼灣鬧市當中，原來同香港天仁茗茶係同一個老闆。新品牌走年輕人路線，不過用料一樣認真，所有珍珠都喺店裡面即日製作，煮好過冷河後兩個鐘頭內用完。
 

新店開張有黑糖、蜂蜜、紅火龍果同期間限定嘅榴槤四款珍珠口味，全部都有膳食纖維感覺都健康啲。而茶底就用原片茶葉自家沖調，亦會喺三個鐘頭內用完。
 

榴蓮鮮奶綠配榴蓮珍珠（$32）

最特別嘅就要數到榴槤珍珠！選用馬來西亞榴槤醬製作嘅珍珠咬落榴槤香唔算好濃，店家話因為想平時唔食榴槤嘅朋友都可以試到咁解。反而杯榴槤鮮奶綠茶就幾香榴槤味，建議各位榴槤Fans揀五分或者三分糖，再特別註明要雙重榴槤醬，咁就保證啖啖榴槤香！
 

黑糖珍珠歐蕾（$32）

今年大熱嘅黑糖珍珠呢度當然亦有！雖然黑糖掛杯紋唔算明顯，不過珍珠黑糖味都幾突出，而且唔會死甜，算係幾大眾化嘅口味。店家用嘅係明治鮮奶，配搭起嚟奶味同黑糖味平衡。
 

滇紅鮮奶茶配黑糖珍珠（$25）

如果唔想飲太多牛奶嘅話，亦可以改配呢度嘅鮮奶茶，包括大紅袍鮮奶茶、滇紅鮮奶茶、茉香歐蕾等等。仲可以造出搶鏡嘅漸層賣相，啱哂打卡。
 

 

抹茶歐蕾配紅火龍果珍珠（$30）

紅火龍果珍珠嘅粉紅色相當亮眼，仔細睇仲保留咗一粒粒黑色果籽，略嫌食落火龍果味道較淡，以甜味為主。而抹茶歐蕾飲落帶抹茶清香，想試清楚啲回甘嘅話一樣建議揀三分糖。
 

Bobba鮮果茶配紅火龍果珍珠（$25）

呢度亦有水果茶系列，建議配紅火龍果或者蜂蜜珍珠。鮮果茶係滇紅茶底，配橙汁同橙、蘋果、青檸等水果，味道清新帶果香。
 

芒果雪頂配蜂蜜珍珠（$25）

雪頂其實即係忌廉奶蓋，同樣建議配紅火龍果或者蜂蜜珍珠。蜂蜜珍珠有蜂蜜嘅清香同甜味，口感外軟內Q非常討好。
 

（左）蘭香烏龍歐蕾配榴槤珍珠（$30）， （右）招牌鮮奶茶配榴蓮珍珠（$30）

環保杯套

新店呢個週末仲有活動！10月6號至7號（星期六至日）凡購買任何飲品都可以玩扭蛋，裡面會有優惠券加任一顏色環保杯套，想試嘅就唔好錯過呢個機會啦。
 

Just Bobba
銅鑼灣景隆街3號地下B舖

文、相、片：Cathy