四川菜一直以來都有班捧場客，而銅鑼灣呢間川菜食府，更集合點心、小菜同火鍋3個主題。喺度你會搵到辣子大腸等傳統川菜外，亦有藤椒象拔蚌、香辣古井鵝肉脆炸包等融入新元素嘅款式。加上餐廳由曾任職三希樓同駿景軒嘅川菜大師，李志光師傅同梁業遠師傅坐鎮，出品有一定保證。

現時多款菜式設有外賣自取優惠；而2:30pm-6:00pm堂食則有8折優惠，想再抵啲嘅話，記得同時用埋OpenRice餐飲券。

點心

左：川椒斑肉韮菜水晶果（$78）｜右：香辣古井鵝肉脆炸包（$68）

呢度嘅點心由永利宮前點心總廚陳世輝師傅主理，除咗有傳統口味之外，更創作出多款川味點心。其中川椒斑肉韮菜水晶果用新鮮芝麻斑、蝦肉同韮菜做餡，再混入四川直送嘅泡椒同剁椒帶出海鮮嘅鮮味，清新爽口。

香辣古井鵝肉脆炸包（$68）嘅工序繁複

而香辣古井鵝肉脆炸包要先將鵝肉、洋蔥同菇粒混入川椒、泡椒同麻醬炒香做餡，包好蒸熟，再人手將包面薄薄嘅外皮撕走，然後炸至金黃色。食落香脆唔油膩，但始終炸過，濕潤感低啲，要大啖咬埋嫩滑嘅鵝肉中和返。

川菜

藤椒象拔蚌（$158）

四川位處內陸，本身好少海鮮菜式，而創作藤椒象拔蚌呢道菜，係想配合返香港多海鮮食材嘅元素。象拔蚌肉灼熟後鮮甜爽彈，配搭烤過嘅雞腸椒製成川味冷盤小食，口感清爽，辣中帶甜幾開胃。

辣子大腸（$208）

「辣子」係川菜其中一個重要類別，而辣子大腸係當地傳統菜式之一。師傅用魔鬼椒、子彈椒、紅花椒等多種四川香料製作呢道菜，有濃郁嘅辛香味；大腸則炸至略為乾身，食落脆口，亦冇油唧出嚟，一洗炸大腸會成口油嘅感覺。

酸菜桂花魚（$438/ 細）

酸菜魚少有地配搭秀珍菇，感覺比較清爽

受唔少人歡迎嘅酸菜魚亦可以喺度揾到！桂花魚厚肉嫩滑，配搭同魚肉差唔多大細嘅秀珍菇增加咬口；而湯汁嘅顏色睇落似淡湯，其實加咗四川辣椒蓉，味道爽辣順喉。

火鍋

正宗麻辣湯鍋（$188/窩）

既然主打川菜，火鍋系列自然有正宗麻辣湯鍋。湯底特別加入四川嘅郫縣豆瓣醬，配合大量四川辣椒同二十種香料製作，香氣十足，先辣後麻嘅滋味令人食得好過癮。

牛雜鍋（$388/窩）

湯底清甜，牛雜款式則按當日來貨而定

想試特色湯底嘅話，開飯仔推介大家試牛雜鍋。由於本地新鮮牛雜嘅供應量唔多，呢款每日限量供應。湯底用新鮮牛骨、牛肚、牛腸等多款內臟，加入香料熬煮7-8個鐘後，味道好似清湯腩咁香醇。

騸牯牛牛白肉（$238）

騸牯牛爪邊肉（$588）

而打邊爐必點嘅牛肉，有多款特別部位可以揀。白雪雪嘅騸牯牛牛白肉，即係胸肋骨上嘅筋膜肌肉，爽口富油香，但食得多都會有啲膩。而手切騸牯牛爪邊肉嫩滑有咬口，味道濃郁，但有一定厚度，唔可以快灼幾秒就食，時間要控制得宜先品嚐到最佳口感。

餐廳環境雅致，以唔同嘅中式藝術品作裝飾

另有數間氣派舒適嘅獨立房間

川川   
地址: 銅鑼灣勿地臣街1號時代廣場11樓1102號舖

文、相：Cathy.C