阿華田同好立克都係大家嘅童年回憶，只要出一相關嘅甜品同飲品都會令大家為次瘋狂。觀塘呢間新開茶飲店選擇有成五十款，最主打就係波波茶系列嘅阿華田波波冰同好立克波波冰，除此之外仲有養生桃膠、炭燒烤奶、波霸系列及酸奶系列等，總有一款啱你飲！

阿華田波波冰($38)

阿華田波波冰內加入阿華田朱古力醬、奶漿、阿華田沙冰、珍珠及芝士奶蓋，奶蓋上仲有啲阿華田脆脆，阿華田味真係好濃郁！不過唔好以為咁就好Heavy，因為加咗店主獨家研發嘅奶漿，味道會較creamy重奶味，而且無咁甜～最貼心係加埋阿華田沙冰，就唔怕越飲越啖啦！

好立克波波冰($38)

好立克波波冰就少見啲！製法就同阿華田波波冰差唔多，都係加入沙冰及自製奶漿，芝士奶蓋上加入胚芽，胚芽味會重啲。

桃膠厚鮮奶($28)

女生杯想養生啲，呢杯桃膠厚鮮奶就啱晒！桃膠自己浸自己煮，加埋淡奶味道濃厚。數量有限賣完就無啦。

靜岡宇治金時($25)

綠茶控要留意！靜岡宇治金時選用靜岡綠茶粉，綠茶味香濃，奶蓋上加咗綠茶粉及綠茶脆餅，啖啖都係綠茶味～底部嘅紅豆自己買返嚟煮，大粒夠腍仲重豆沙味。而且成杯飲品都無落糖，就唔怕邪惡啦～

炭燒珍珠烤奶($25)

烤奶有一陣淡淡嘅炭烤香味，而且比較稀身，飲落都無咁易漏。

半茶匙

地址: 觀塘成業街7號東廣場地下G21號舖

文: Yanica

相、片: Tom Li