除咗人要衣裝，餐廳都要靚裝，咁樣食起飯上嚟先至更加悠閒、享受。心情好，餐飯都特別好食啲。所以而家好多餐廳都花咗好多心思喺裝修度，以下介紹嘅呢兩間都唔例外，而且，佢哋嘅食物一樣咁有心思，嘗試咗好多唔同嘅創新配搭，為食客帶嚟新鮮感。
L'amour（大埔） 
大埔餐廳選擇眾多，要突圍而出，必須要花啲心思。呢間主打法國菜式嘅餐廳，無論環境裝修定係食物賣相都富有特色。L'amour喺法文中有愛嘅意思，中庭掛有水晶吊燈，沙發係絲絨質料，坐得人好舒服，飲下嘢傾下偈咁好relax。食物方便，由資深法廚團隊帶領，創作多款分子料理同經典菜式：
波特酒釀三色蜜瓜、巴馬火腿
巴馬火腿固之然係絕配，今次主廚仲特別加入波特酒，一粒粒蜜瓜香甜中滲有酒香，配埋鹹香嘅火腿都未夠，仲有用蜜瓜汁做成嘅魚子，口感豐富又有新鮮感。而且仲以酒杯盛載住，杯邊配多片自家烘乾嘅鮮菠蘿片，十足十一樣cocktail一樣。
法式燉鵝肝
以傳統焦糖燉蛋嘅製作方法，用上法國高級忌廉、雞蛋、熟成芝士等，加入埋鵝肝醬，成件事唔止即刻名貴咗，味道嘅層次都多咗。香滑嘅燉蛋，混和濃郁嘅鵝肝，滿滿蛋香同油香。就連伴食嘅多士，都砌到成朵玫瑰咁，好鬼靚！
慢煮西班牙黑毛豬鞍配焦糖蘋果
西班牙黑毛豬鞍以慢煮嘅方法處理，保留到原有嘅肉汁，夠juicy之外，仲令到肉質有爽口彈牙嘅感覺。而伴碟嘅配菜亦都有花過心思製作，切片蘋果塗上一層焦糖，本身嘅清甜再有多重香甜嘅感覺。
慢煮八爪魚墨汁意大利飯
意大利飯本身已經係一樣相當考功夫亦花時間嘅菜式，仲要加埋慢煮八爪魚，呢道菜嘅預備時間最少都要用上12個鐘。八爪魚選用日本刺身嘅級數，慢煮完再以頂級墨魚汁，配合分子料理嘅技術，變到好似魚子醬咁樣，充滿鮮味。意大利飯粒則係自家特製嘅薏米，口感煙韌。
美女與野獸
呢道菜式嘅靈感，嚟自《美女與野獸》內放喺玻璃瓶內嘅玫瑰花。主廚用上豆蓉、天然紅菜頭粉調成玫瑰紅色，再以韓國唧花手法，一塊一塊花瓣咁做出嚟，好有心機啊。然後更會喺瓶內煙燻法注入氣味。上枱時，提提鍾意拍片打卡嘅朋友，記得預備定鏡頭。一打開個瓶嘅一刻，會有「仙氣」散發呢。
Missy Ho's （西環）
主打多國Fusion菜嘅呢間餐廳，地理位置非常方便，港鐵站一出行兩三分鐘就到。從裝修已經睇得出佢哋fusion嘅路線，中國風嘅感覺但又有西方動畫嘅裝飾。無論係中、日、泰等各國嘅菜式都可以喺度食到，款款驚喜。不論係同朋友嚟聚會，定係同另一半嚟享受下小日子，都會有種chill chill der 感覺。
Spicy Salmon Dynamite Roll
壽司、卷物配搭創新，好似辣三文魚炸卷物咁，方方正正，混和咗三文魚、牛油果、蟹肉、蟹籽、辣味蛋黃醬等，面層仲有層芝士醬，我都唔想用邪惡呢個字去形容，但真係邪惡喎。而且三文魚肉夠厚身，微微辣香更能提吊出鮮味。
Tuna Tataki
吞拿魚刺身當然好食，不過輕輕燒一燒過又有唔同嘅風味。邊邊位滲出陣陣焦香，伴隨住濃厚嘅肉香，加埋柚子豆瓣醬同墨西哥辣椒等，層次豐富。作為前菜相當醒胃。
Pork Belly Bao
軟熟嘅刈包夾住大大嚿嘅五花腩肉，份量十足。啖啖肉香好易膩？唔怕。師傅特地加入多款清爽配菜，好似蘿蔔、青瓜同蕃茄等，可以中和返膩感。師傅仲低調咁幫緊你，淋上海鮮醬令到整體味道更香濃。
Gyoza Dumplings
煎餃子易煮難精，試一試就試得到師傅深厚嘅功力。一碟八隻嘅日式煎餃子，外層煎得香脆，內餡有豬肉、韮菜，仲特地加埋泡菜，酸酸辣辣，豐富咗成隻餃子嘅味道。
Miso Black Cod
味噌黑鱈魚係一道相當惹味嘅菜式，煎烤過嘅黑鱈魚皮微焦香脆，魚肉依然香滑細緻，而且滿滿油脂，就咁食當然鮮香，如果點一點埋mayo醬，味道又有所提昇。
心動不如行動！有興趣就快啲約埋三五知己去嘆下美食！快啲bookmark定啦！
*以上圖片只供參考，所有食品以實物為準. 食品供應因餐廳而異
