來自韓國嘅過江龍阿里郎熱狗棒，繼旺角店後第二分店終於登陸港島區！中環新店比起旺角更闊落，有立食位置畀客人食埋先走。而且新店唔係淨係得韓式熱狗，新增咗唔少menu。包括新口味Oreo芝士拉絲熱狗棒、四款韓式吐司，韓式便當同紫菜包飯，附近返工嘅朋友要留意啦。

Oreo 芝士拉絲熱狗棒 ($38)

餐廳除咗供應舊有八款口味熱狗外，新口味Oreo 芝士拉絲熱狗棒將條狀芝士裹上麵團、Oreo churros及麵包糠後拎去油炸，最後加上肉桂粉及Oreo醬，味道香甜。而且真係勁拉絲呀！

阿里郎多士($38)

中環新店亦推出咗四款韓式吐司，包括阿里郎多士、蝦多士、韓式烤肉多士及香辣雞肉多士。阿里郎多士就係基本火腿芝士口味，加埋士多啤梨醬及Kiwi醬，味道鹹鹹甜甜好開胃～

韓式烤肉多士($44)

而鐘意食肉就可以揀呢個韓式烤肉多士，用新鮮牛肉代替韓國吐司常見嘅肉扒，好juicy，而且再加上牛肉醬汁，肉味特別濃！

韓式辣豬肉飯($78)

驚唔夠飽？店內仲有供應韓式便當，有牛肉、豬肉及素食選擇～辣豬肉香辣惹味，紫米飯上仲有香煎蔥餅、雞蛋卷及泡菜餅以及多款小菜添。

吞拿魚美乃滋紫菜卷($58)

講到韓國食物又點少得紫菜卷，同樣同紫米代替白飯，加入大量吞拿魚及沙律醬，食落勁滿足！

阿里郎熱狗棒  

地址: 中環士丹頓街7號地庫

文: Yanica

相、片: Calvin Kwok