打工仔最期待嘅假期，終於都嚟啦！無諗住出外旅行嘅話，不如留喺香港，book番間靚景餐廳，同另一半或屋企人去促進消費啦！但邊啲餐廳可睇到煙花之餘，食物又好味呢？即睇邊4間國慶餐廳推介先！

新派刺身和食 天穴 

開業約兩星期嘅天穴，主打新派日菜，定食、壽司、丼飯、炸物、爐端燒、鐵板燒樣樣有。餐廳佔地逾2,000呎，並劃分為omakase、天扶威、串燒、cocktail酒吧4個部分，不過最正嘅view就梗係室外望盡維港海景嘅露天酒吧啦！

食物有(左)北海道海膽；各款特色cocktail，好似(右)Made in Japan。

餐廳分室內、露天座位，即使坐室內座位，都可以透過落地大玻璃觀賞整個維港煙花景。

尖東熱鬧意菜 Spasso

鍾意熱鬧，但又唔想同人逼？可以考慮位於尖東海傍嘅Spasso。國慶當晚，餐廳主打幾款招牌意大利菜式，一邊食casual嘅晚餐，一邊睇煙花。要注意，8:30pm後入座設最低消費，每位客人為$550。

意大利燒乳豬、瑪格利特薄餅

黑松露香草羊架、牛仔骨配番紅花意大利飯

豪食煙花自助餐 自助山 

經常爆booking嘅自助山，坐擁全港唯一嘅360°旋轉餐廳，講靚景無得輸！至於食物肯定滿足到大部分香港人，因為非常多海鮮！生蠔有2-3款選擇，凍海鮮更多到5-6款，龍蝦、麵包蟹、蟹腳、即煮大蝦等等！另有燒牛扒、熱盤、甜品等等。

香燒龍蝦、即捕即煮嘅大頭蝦

好華麗嘅朱古力噴泉，以及炒雪糕

酒類販賣機

國慶煙花自助晚餐
供應日期及時間：2017年10月1日6:30pm-10pm
價錢：成人$858/位、3-11歲小童$538/位，另設加一

羅曼蒂克國慶餐 La Bombance

雖然餐廳喺銅鑼灣嘅大廈入面，但勝在樓層夠高，可遠眺維港夜景！嚟緊十月一日國慶假，除咗有靚景，仲有Chef Ishiba特別炮製嘅國慶套餐，由前菜、燒物到熱食、釜飯，一共有7道菜式，當中有龍蝦、黑松露、蘑菇、松茸、吞拿魚、鰻魚等海鮮，都幾豐富！

鰻魚釜飯

文：Joy