呢排天氣好鬼翳焗，好多時就算過晒晚飯時間都冇胃口？其實大家可以選擇煲個快靚正嘅滾湯，雖然備料時間會比其他簡易食譜長，但只要預備好晒就掉落個煲度，加水滾一滾就飲得同食得，輕輕鬆鬆又食到肉又食到菜！飲夠兩碗就唔怕自己仲有空間食零食同飲廢水啦！

🍅番茄甘筍薯仔牛肉湯

 圖：archanaskitchen｜西式蕃茄濃湯又別有一番滋味，但相對地就冇中式咁清爽

番茄作為湯料真係萬能KEY！而呢個組合更係我哋屋企最愛，因為可以一次過食到菜、肉同澱粉嘛！

 **3-4人每人預飲2-3碗
- 4-6個番茄、2-3條甘筍同2-3個薯仔切成一嚿嚿 (一口大細左右；番茄唔好切太細，如果唔係煲長少少時間就會失蹤)
- 免治牛肉就預備大概200-300g (視乎有幾鍾意食肉)，用少少豉油、糖、廚酒醃最少15分鐘
- 煲滾一煲水 (半個中型煲咁上下水量啦，即係大概1.5L)，落晒所有蔬果類落去 (怕寒又唔怕薑味嘅可以切一兩塊薑落去煲)
- 滾起10分鐘左右再落牛肉波波 (用匙羹或者戴手套搓)，滾多20分鐘就飲得 (怕唔夠味就記得試飲，必要時可加返少少清雞湯)

節瓜鹹蛋🥚瘦肉湯

 圖：koreanbapsang｜ 鹹蛋同節瓜呢個組合仲可以合體成煎餅！

瓜類易吞易消化，唔使點咬就吞到，冇胃口都唔驚！

 **3-4人每人預飲2-3碗
- 預備3-4個節瓜，都係切成一嚿嚿一口大細左右
- 2隻鹹蛋分開蛋白同蛋黃
- 瘦肉預200g左右都好夠，都係切成一嚿嚿一口大細左右。照舊用少少豉油、糖、廚酒醃最少30分鐘
- 煲滾一煲水 (大概1.2L)，繞住個煲邊倒2圈清雞湯 (可因應個人口味加減)，先落節瓜、瘦肉
- 滾後落鹹蛋蛋黃 (如果想湯水有陣陣蛋黃黃油可以先用匙羹壓一壓)
- 滾多15分鐘就可以慢慢沿煲邊一路倒鹹蛋蛋白，期間要一直攪拌住個湯令蛋白變成蛋花 (攪拌力度對於咬唔咬到鹹蛋白有直接影響，想咬到嘅記得唔好攪得太快太大力)
- 攪拌完滾多3-5分鐘，飲得！

紫菜蛋花豆腐湯🥣

 圖：shopify

講懶人湯水，紫菜湯嘅方便程度真係同即沖味噌湯差唔幾！而且紫菜湯本身味唔重，除咗蛋花豆腐咁清，加魚蛋/魚片、加蜆仔都好夾！

 **3-4人每人預飲2-3碗
- 紫菜預1-2塊(視乎有幾大啦，注意返細細塊都會「發」到好大)，沖乾淨
- 豆腐切成一粒粒，再切多兩塊薑片
- 凍水落薑滾，滾水後再落豆腐同紫菜
- 滾5分鐘左右，將2隻雞蛋打勻後一邊輕輕地攪拌煲湯一邊倒落去
- 試味 (唔夠味就加少少鹽) ，搞掂！

冬瓜🍤瑤柱冬菇粒粒湯

基本上呢個湯水即係酒樓常叫菜式——冬瓜盅，自己喺屋企整就唔使再自己挖瓜肉又驚挖穿啦~

**3-4人每人預飲2-3碗
- 冬瓜買斤半應該都好夠，切粒 (留唔留皮都冇咩所謂)
- 冬菇浸3-4隻、瑤柱浸4-5粒 (兩樣都係視乎大細同口味啦~)，冬菇浸軟身之後切粒粒，瑤柱就撕成一絲絲，冬菇同瑤柱水留低
- 急凍蝦約10-15隻 (都係視乎大細同口味啦~) 解凍後落白胡椒粉同廚酒醃一醃 (10-15分鐘左右)
- 切兩塊薑片，連埋冬瓜粒、冬菇粒、瑤柱碎凍水落
- 滾起後倒少少清雞湯，計10分鐘後再落埋啲蝦
- 再滾起計5分鐘，試啱味就又飲得喇！

文：Apple