每個月總有一啲日子想食得簡單一啲，唔想大魚大肉，反而會想去附近街口嘅餃子店。簡簡單單嘅餃子偏偏係最令人懷念，但簡單嘅食物要煮得好食，亦係一門學問。開飯仔就搜羅咗六間唔同嘅餃子店，一齊黎睇下邊間最似媽媽嘅味道啦。
位於美食天堂深水埗嘅山東餃子館，淨係餃子已經有十幾款餡料畀你揀，想食飽嘅可以揀五隻餃子配麵，女士們細食嘅就可以揀十隻餃子，餃子皮薄料多，全部都係街坊價錢，非常抵食。唔怕羊肉膻味嘅朋友可以試下呢到嘅京蔥羊肉水餃同羊肉串燒，都非常惹味。唔鍾意食羊肉嘅話，白菜馬蹄鮮肉水餃亦唔錯，豬肉配上爽口馬蹄，口感豐富。舖面睇落有啲簡陋，但舖內經常坐滿街坊幫襯，反而多咗一份平民美食嘅親切感。
大排長龍都要食 美味餃子店
（圖：amy0802、eatnonstooop）
食餃子除咗著重餃子皮同餡料質素，湯底都唔可以睇少，美味餃子店用上野葛菜煲生魚豬骨湯底做餃子湯底，絕非味精湯，食餃子嘅同時可以嘆埋碗靚湯，唔怪得呢到晚晚都大排長龍！餃子餡雖然多菜少肉，但配上呢到嘅自家製辣菜莆，辣味為本來較為清淡嘅餃子帶黎多一份刺激。美味餃子店逄星期日休息，唔想摸門釘嘅就記住揀其他日子去喇！
平價米芝蓮餐廳 阿純山東餃子
阿純山東餃子曾經入選2013年米芝蓮美食推介，老闆係真正山東人，煮法夠晒正宗，價錢合理，至今仍然有唔少捧場客。蒸餃子皮薄多汁，加五蚊就可以轉做煎餃，比較香口。食餃子之餘，呢到嘅山東燒雞亦幾乎係每枱都會叫，份量夠多肉質夠嫩，味道啱啱好。多人食嘅話記住試埋拔絲地瓜，口感特別又唔會太甜，做飯後甜品就夠晒滿足啦。
灣仔區老字號 北方餃子源
已經有十三年歷史嘅北方餃子源位於灣仔藍屋附近，單單係舖面古色古香嘅牌坊引人注目，入到舖內發現只係簡單嘅食店擺設。由於店舖座落喺港島區，價錢相對貴少少，勝在餃子大大粒，亦好足料。招牌茴香牛肉餃茴香味唔重，但充滿肉汁，令人回味無窮。而煎餃就比較似油炸嘅口感，外皮煎至金黃色同脆身，唔怕熱氣嘅朋友都可以試下。
隱世特色炸餃子 有得餃
白菜豬肉做餡嘅水餃就食得多喇，但金菇肥牛、咖哩雞肉同芝士比薩做餡嘅炸餃子你又試過未呢？呢間喺元朗嘅有得餃，淨係舖名已經夠攪鬼，無諗過連食物都咁有創意！雖然店舖環境較小，但街坊風味十足。金菇肥牛炸餃份量相當巨型，餃子皮炸成金黃色，唔試過都唔知，原來金菇肥牛同餃子都幾夾，絕對可以一戰，特別係鍾意試新野嘅朋友們。
正宗北京風味 北京水餃店
香港人追求好食嘅餃子一向係皮薄餡多，偏偏北京水餃店就堅持製作正宗北京厚皮餃子。由於餃子係北方人主要食糧，皮一定要夠厚先夠飽肚，本來以為厚皮餃子就唔好食，但呢到嘅餃子食落口反而口感充實，更滿足，真係名副其實真材實料。而呢到嘅紅豆燒餅亦係即叫即整，煎香咗煙韌嘅糯米外皮配上紅豆蓉，味道令人驚艷。
文：Dap
讚好OpenRice專頁！
