雖然香港就唔係咁多地方睇到櫻花，但都可以感受到花見嘅喜悅。好似呢間連鎖咖啡店即將喺2月26號推出一系列以春日做主題嘅飲品同食品，粉嫩賣相襯哂代表春天嘅櫻花，當中仲包括一出就大受歡迎嘅布甸杯！
 

草莓蜜糖花見忌廉星冰樂

星巴克咖啡不時會推出季節限定，飲品方面今次會有草莓蜜糖花見忌廉星冰樂。以草莓忌廉星冰樂配上蜜糖味鮮忌廉，喺士多啤梨嘅酸甜當中加入一份甜蜜，忌廉上面再加士多啤梨脆脆，呃Like一流。而熱飲就有草莓蜜糖花見朱古力咖啡。
 

（左）白桃布甸，（右）柚子布甸

而布甸杯更同時推出白桃同柚子兩款新口味！分別喺香滑嘅牛奶布甸當中加入白桃果肉，同柚子果蓉加果肉。包裝亦換上櫻花主題，無論係白桃口味嘅粉紅色櫻花，定柚子口味嘅夜櫻圖案都非常搶眼。
 

（左）士多啤梨雪芳蛋糕，（中）紅莓撻，（右）紅莓牛角酥

其他推介仲有全新嘅士多啤梨雪芳蛋糕，粉紅色嘅士多啤梨雪芳蛋糕外面係一層雪白忌廉，上面再加櫻花脆脆點綴，好有春天氣息。同樣有粉嫩賣相嘅紅莓撻同紅莓牛角酥亦會再度登場，紅莓牛角酥表面仲會有櫻花同士多啤梨脆脆。
 

最後提多一句，全新春日櫻花系列商品，包括隨行杯、水樽等已經即日率先登場。終於唔洗再托朋友去日本或者其他國家買櫻花杯啦。

文：Cathy