香港機場除咗係全球其中一個最繁忙嘅航空樞紐，亦係美食集中地，近期仲有唔少期間限定店登場𠻹～今次就帶大家睇吓4間必試機場美食，等你出發前都可以食得滿足！
地道台式美食 阿元來了
圖：餐廳位置鄰近28號閘口，旁邊仲有座位區，可以望住停機坪慢慢嘆飯，環境舒適。必試阿元魯肉飯便當，手切滷肉粒粒分明，肥瘦均勻，滷得夠入味，每粒都吸滿滷汁，撈飯一流，配上滷蛋、滷豆腐、炒豆同粟米，夠哂豐富。鍾意炸物可以試吓花枝蝦排，外層炸到金黃酥脆，內裡係彈牙墨魚肉包住鮮甜蝦肉，咬落去層次豐富，香口惹味。飲品方面，當然唔少得台式手搖茶，鳳梨青茶酸甜清爽，啱晒解渴～
超人氣雞蛋仔 低調高手大街小食
圖：嚟到香港機場，想食返啲正宗港式地道小食？呢間雞蛋仔一定要試，原味雞蛋仔即叫即整，外層超級薄脆，唔係一般偏軟嘅蛋糕質感，而係帶輕盈脆口，內裡蛋香濃郁，咬開一半空心、一半實心，煙韌之餘仲保留住最原始嘅香氣。即使放一陣，都依然保持一定脆度，唔會變腍。格仔餅同樣唔可以錯過，店員落料毫不手軟，滿滿嘅花生醬溢出嚟，濃郁香滑，入口邪惡又滿足！官方暫時話最少會做到5月，之後再作打算～
高質西餐廳 Beef & Liberty
圖：h0410232
呢度主打手工漢堡，用上高質澳洲安格斯牛肉，配搭新鮮食材，每一口都食到漢堡最純粹嘅美味。牛肉漢堡選用100%澳洲安格斯牛肉，由店內新鮮手打，肉味香濃；手撕豬肉漢堡嫩滑多汁，再加上炸豬皮，一咬落去「卡滋卡滋」，超爽口！裡面仲有青蘋果絲，微微酸甜，清新解膩。佢嘅甜薯條外層炸到金黃香脆，內裡軟綿帶甜，配埋漢堡一流呀！
精品咖啡店 Karavanstop by NODI
圖：如果喺機場等登機，但又唔想飲普通連鎖咖啡，呢間絕對係精品咖啡愛好者嘅好選擇！裝潢保留咗原有嘅簡約綠白色幾何風，同時加入本地元素，包括山脈、高樓大廈、知名景點，畀人一種悠閒又有特色嘅感覺。咖啡方面主打nutty風味，可以選擇手沖咖啡，亦有多款咖啡豆畀客人揀，無論係Latte或濃郁Espresso，都能夠迎合唔同人口味。食物主打簡單輕盈嘅Puff Pastry，同時有沙律、三文治等選擇。提醒大家店舖位於64號閘口，位置較遠，記得預留充足時間慢慢行過去。
其他選擇：
機場一號客運大樓（非禁區）：（按此）
機場客運大樓（禁區）餐廳：（按此）
文：Yanica
編：Cathy
